بیرلشگن ملتلر تشکیلاتینینگ انسانپرورلیک مسألهلرنی موافقلشتیریش اداره (اوچا) نینگ معلوم قیلیشیچه، دوشنبه کونی افغانستان شرقیده یوز بېرگن سېل عاقبتیده۲۶ کیشی جان بېرگن۲۴ کیشی یرهلنگن.
اوچا بوگون (چهارشنبه، ۳۱-سرطان) نشر قیلگن گزارشیده سېل نورستان، ننگرهار و لغمان ولایتلریده انساني تلفات همده کتّه مادّي ضرر کېلتیرگنینی بیلدیردی.
گزارشگه کۉره، نورستان ولایتی مرکزی پارون شهریده یوز بېرگن سېل عاقبتیده۲۳ کیشی هلاک بۉلگن،۱۵ کیشی یرهلنگن، ینه بیر قنچه آدم بېدرَک یۉقالگن. قیدیروو-قوتقروو ایشلری هنوز دوام اېتماقده.
شونینگدېک، ننگرهار ولایتیدهگی تورخم چېگره اۉتیش یۉلیده هم سېل کوزهتیلگن. عاقبتده پاکستاندن قَیتگن اوچ نفر مهاجر جان بېرگن، تۉقّیز کیشی جراحتلنگن.
اوچا معلوماتیگه کۉره، عینِ پیتده لغمان ولایتینینگ الینگار اولسواللیگیده هم سېل کېلیب، قیشلاق اېکین یېرلری و سوغاریش تیزیملریگه ضرر یېتکزگن. بیراق او یېرده انساني تلفات قید اېتیلمهگن.
گزارشده قید اېتیلیشیچه، اېنگ کتّه مادّي ضرر نورستان ولایتی مرکزی پارون شهریگه یېتگن.
سوو تامیناتی ترماغی ویران بۉلگنی سببلی مینگگه یقین عایله تازه ایچیملیک سوویدن محروم بۉلگن.
دستلبکی حساباتلرگه کۉره،۲۲ ته اوی تۉلیق،۴۵ ته اوی قسماً ویران بۉلگن. بوندن تشقری،۵ ته بازار،۷۰گه یقین دوکان،۴ ته کۉپریک،۶ته یۉل اوچستکهسی،۴۰۰ متر حمایه دېواری۴۵۰متر سوغاریش کانالی و۵۰ جریبگه یقین اېکین میدانی ضرر کۉرگن.
شونینگدېک،۲۵ ته ترانسپورت واسطهسی، ایکّیته نجّارلیک اوستاخانهسی و ارّهلش اسکونهلری، بیر مسجد همده بیر خصوصي کلینیک هم ضرر کۉرگن یاکه ویران بۉلگن.
بو آرهده طالبلر پارون شهریده۲۳ کیشی هلاک بۉلگنی،۸۰ کیشی یرهلنگنی و۱۰۰ گه یقین کیشی بېدرَک یۉقالگنینی معلوم قیلگن.
اوچانینگ تاکیدلشیچه، سېل جبردیدهلری شاشیلینچ باشپناه، آزیق-طعام یاردمی، تېزکار طبي خدمت و دارو-درمانلر، آزیق-طعامدن تشقری ضرور بویوملر همده روانی-اجتماعي یاردمگه محتاج.
