طالبلر نینگ فواید عامه وزیرلیگی تېمیر یۉل بۉییچه وزیر اۉرینباسری محمد اسحاق صاحبزاده باشچیلیگیدهگی هیئت اۉزبېکستانگه تشریف بویوریب، «اۉزبېکستان تېمیر یۉللری» باشلیغی ظفر نرزلوف بیلن اوچرهشدی.
وزیرلیک مطبوعات سۉزلاوچیسی محمد اشرف حقشناس بوگون (چهارشنبه، ۳۱-سرطان) نشر قیلگن بیاناتیده اوشبو تشریف حقیده معلومات بېردی.
اونینگ ایتیشیچه، تشریفدن مقصد تېمیر یۉل ساحهسیدهگی ایکّی تامانلهمه همکارلیکنی مستحکملش، قۉشمه لایحهلرنی کوزهتیب باریش و آستقورمه لایحهلرینی عملگه آشیریشنی جدللشتیریشدن عبارت.
حقشناس نینگ قۉشیمچه قیلیشیچه، اوچرهشووده بیر قطار مسألهلر، جملهدن «افغان-ترانس» تېمیر یۉل لایحهسی بۉییچه تخنیکي-اقتصادي اساسلش و دستلبکی تدقیقات ایشلرینی باشلش بحث قیلینگن.
شونینگدېک، هرات-مزار شریف تېمیر یۉلینینگ تخنیکي-اقتصادي اساسلش و لایحه حجتلرینی افغانستان تامانیگه تاپشیریش، حیرتان-مزار شریف تېمیر یۉلی نینگ تۉرتینچی پورتیده قۉشیمچه انشااتلر، انبارلر و ترماقلنگن تېمیر یۉل لینيهلرینی قوریش مسألهلری هم کون ترتیبیدن اۉرین آلگن.
محمد اسحاق صاحبزاده و ظفر نرزلوف افغانستان همده اۉزبېکستان اۉرتهسیده تېمیر یۉل آرقهلی تجارت یوکلری تشووینی آشیریش نینگ تخنیکي جهتلری یوزهسیدن هم فکر المشگن.
معلوماتلرگه کۉره، جاري ییل نینگ دستلبکی آلتی آییده افغانستان و اۉزبېکستان اۉرتهسیده تېمیر یۉل آرقهلی عملگه آشیریلگن تجارت یوکلری حجمی۳،۵ میلیون تُنگه یېتگن.
مرکزي آسیا دولتلرینی افغانستان و پاکستان حدودی آرقهلی هند اقیانوسی بیلن باغلشنی کۉزده توتووچی افغان-ترانس تېمیر یۉل لایحهسی منطقه نینگ اېنگ ییریک ترانسپورت تشبثلریدن بیری حسابلنهدی و حاضرچه تخنیکي-اقتصادي اساسلش باسقیچیده قالماقده.
