طالبلر رهبری هبتالله آخوندزاده قندهارده اۉتکزیلگن ییغیلیشده ولایتنینگ اولسواللیک و شهر ناحیهلریدهگی دیني علمالردن اۉزلری و اهالی آرهسیده «اطاعت» روحینی مستحکملش اوچون حرکت قیلیشنی سۉرهدی.
بوگون (چهارشنبه، ۳۱-سرطان) بۉلیب اۉتگن ییغیلیشده او قندهار علمالریگه شوندهی دېدی: «حرکت قیلینگلر، هم اۉز آرهنگیزده، هم خلق آرهسیده اطاعت روحینی کوچهیتیرینگلر. شونده بیرلیک ینه-ده مستحکملنهدی و فتنه اېشیکلری یاپیلهدی».
هبتالله آخوندزاده ینه شوندهی دېدی: «بوگون الله افغانستانده شریعت تیزیمینی برپا اېتدی. شریعت امیریگه بیعت مسلمانلرنینگ اتفاقی و جهاد یۉلی بیلن یوزهگه کېلدی. اېندی الله علمالرگه بیر-بیرینی سېویش و اۉزارا ایشانچنی مستحکملش اوچون یخشی امکانیت بېردی. شونده دشمن اولر آرهسیگه نفاق سالیش امکانینی تاپه آلمهیدی».
طالبلر رهبری قندهار علمالریدن طالبلر بیلن تۉلیق همکارلیک قیلیشنی، آدملرنی «بېهوده ایشلردن» قَیتریشنی، اهالی آرهسیده مفکوروي توشونتیریش ایشلرینی کوچهیتیریشنی همده طالبلر قانونلرینی آدملرگه یېتکزیب، اولرنی بو قانونلردن خبردار قیلیشنی سۉرهدی.
طالبان 2021-ییلده افغانستانده حاکمیتنی قَیته اېگهلهگنیدن بویان هبتالله آخوندزاده اۉز فرمانلریگه اطاعت قیلیش و اۉزیگه بیعت بېریش مسألهسینی منتظم روشده تأکیدلب کېلماقده.
بو اېسه طالبان حاکمیتی قریب بېش ییل اۉتگنیگه قرهمهی، هنوز ایچکی و خلقارا سیاسي مشروعیتگه اېگه اېمسلیگی یانیده یوز بېرماقده. حاضرگه قدَر روسيهدن باشقه هېچ بیر دولت طالبان حکومتینی رسماً تن آلمهگن.
