هرات ولایتینینگ اوبه اولسواللیگیده منبعلرنینگ معلوم قیلیشیچه، اوشبو اولسواللیکنینگ نفوذلی محلي شخصلریدن بیری قوراللی هجوم عاقبتیده اۉلدیریلگن.
منبعنینگ معلوماتیگه کۉره، هلاک بۉلگن شخص ارباب جمعه گُل ساغري بۉلیب، او ملا میر حسن قیشلاغیده یشهگن و اوبه بازاری حدودیده دوکان یوریتگن.
منبعنینگ ایتیشیچه، او سهشنبه کونی (۳۰-سرطان) ساعت تخمیناً۱۲:۰۰ده اولسواللیک مرکزیدن اوییگه قَیتهیاتگنیده، طالبلر استخبارات ریاستی بناسیدن قریب۱۰۰ متر اوزاقلیکده قوراللی هجومگه اوچرهب، واقعه جاییده اۉلدیریلگن.
منبعنینگ بیلدیریشیچه، جمعه گُل ساغري اوّلگی ییللرده سابق جهادي قوماندانلردن بیری بۉلگن.
او ایلگری قیشلاق اربابی (آقسقالی) صفتیده فعالیت یوریتگن، کېینگی ییللرده اېسه اوبه بازاریده سودا بیلن شغللنگن.
شونینگدېک، اونینگ جیینی افغانستان سابق جمهوریت دوریده ملي خوفسیزلیک ریاستی خادیمی بۉلیب ایشلهگن.
حاضرچه اوشبو قاتللیک نینگ سببی و اونی صادر اېتگن شخص یاکه گروه نامعلوم. اونینگ دفن مراسمی بوگون (۳۱سرطان) توشدن آلدین اۉتکزیلگن.
طالبلرنینگ هراتدهگی محلي رسميلری حادثه یوزهسیدن حاضرچه هېچ قندهی بیانات بېرمهگن.
اۉتگن هفته هم هرات شهرینینگ باباحاجی محلهسیده محلي نفوذلی شخصلردن بیری وکیل احمد فیضي قوراللی هجوم عاقبتیده اۉلدیریلگن اېدی. او سابق جهادي قوماندان اسماعیلخان نینگ یقین صفداشلری قطاریده تیلگه آلینردی.
