محلي منبعلرنینگ معلوم قیلیشیچه، پنجشیر ولایتیده کوچلی یامغیر یاغیشی و سېل کېلیشی عاقبتیده دره اولسواللیگی بازاری ویران بۉلگن.
منبعلرگه کۉره، بوگون (پنجشنبه،۱ اسد) ساعت تخمیناً۴:۳۰ده کوچلی سېل دره اولسواللیگی مرکزی و بازارینی قمرهب آلیب، کۉپلب دوکانلرنی ویران قیلگن.
شونینگدېک، سېل دره اولسواللیگی پنجشیر ولایتی مرکزی بیلن باغلاوچی اساسي یۉلنی هم یاپیب قۉیگن.
منبعلرنینگ تأکیدلشیچه، دره اولسواللیگیدهگی «دره کرمان» و «دره عبداللهخیل» قیشلاقلری همده رُخه اولسواللیگدهگی حصارک منطقهسیده هم کوچلی سېل کوزهتیلگن. عاقبتده تورر جایلر، موتر یۉللری و اېکینچیلیک یېرلریگه جدّي ضرر یېتگن.
طالبلرنینگ پنجشیردهگی قیزیل یریم آی ریاستی سېل عاقبتیده انسانلر هلاک بۉلمهگنینی، بیراق کتّه مقدارده مادّي ضرر یېتگنینی معلوم قیلگن.
سۉنگّی کونلرده افغانستاننینگ بیر قطار ولایتلریده کوچلی یاغینگرچیلیک و ویرانکار سېللر کوزهتیلماقده.
جاري هفتهنینگ دوشنبه کونی نورستان ولایتی مرکزی پارون شهریده یوز بېرگن کوچلی یامغیر و سېل عاقبتیده کۉپلب انسانلر هلاک بۉلدی و کتّه تلفاتلر یوزهگه کېلدی.
