افغانستان آزادلیک جبههسی بدخشان ولایتینینگ زیباک اولسواللیگیده اویوشتیریلگن هجومده کمیده۲۱ کیشی طالبلر اعضاسی، جملهدن گروهنینگ بیر نېچه قوماندانلری اۉلدیریلگنی ینه۳۷ طالب یرهلنگنینی معلوم قیلدی.
جبهه بوگون (جمعه،۲ اسد) نشر قیلگن بیاناتیده تۉقنهشوولرده اۉز صفیدهگی بیر جنگچی هم اۉلدیریلگنینی بیلدیردی.
بیاناتگه کۉره، جبهه کوچلرینینگ زیباک اولسواللیگیدهگی هجومی کېچه اېرتهلب بیر نېچه یۉنهلیشدن باشلنگن و هنوز دوام اېتماقده.
جبههنینگ دعوا قیلیشیچه، اونینگ کوچلری طالباننی زیباک چېگره کندکی اطرافیدهگی بلندلیکلرده جایلشگن تینچ نقطهلریدن سیقیب چیقرگن. طالبلرنینگ اوشبو منطقهلرنی قَیتریب آلیشگه قرهتیلگن بیر نېچه اورینیشلری اېسه موفقیتسیز یکونلنگن.
طالبلرنینگ «۲۱۹عمرثالث فرقهسی» هم اۉزیگه یقین یېتکرمهلر آرقهلی اوشبو تۉقنهشوونی تصدیقلهدی و جنگلرده «بېش نفر عصیانچی» هلاک بۉلگنی، ینه بیر نېچه کیشی یرهلنگنینی دعوا قیلدی.
مذکور فرقه نینگ مطبوعات بۉلیمی «حریت رادیوسی»گه بېرگن معلوماتیده جنگ زیباک اولسواللیگینینگ «تۉپخانه» منطقهسیده یوز بېرگنینی ایتدی. شونینگدېک، هجومچیلر پاکستاننینگ چترل ایالتیدهگی «شاه سلیم» منطقهسیدن افغانستانگه کیرگنی و اولرنینگ اَیریملری تۉقنهشوودن سۉنگ ینه چترالگه قَیتگنینی ادعا قیلگن.
سۉنگّی وقتلرده بدخشان ولایتی طالبانگه قرشی قوراللی گروهلرنینگ هجوملریگه تېز-تېز گواه بۉلماقده.
بوندن اوّل « سپاهیان میهن» دېب اتهلووچی گروه بدخشان نینگ یفتل اولسواللیگیگه هجوم اویوشتیریب، اولسواللیکنی بیر نېچه ساعت دوامیده طالبلر نظارتیدن چیقرگن اېدی.
بو ۲۰۲۱-ییلده طالبان حاکمیتگه قَیتگنیدن بویان ایلک بار بیر اولسواللیک اوشبو گروه نظارتیدن چیققنی صفتیده قید اېتیلگن.
