پاکستان باش وزیری اۉرینباسری و تشقی ایشلر وزیری محمد اسحاقدار افغانستاندن کېلهیاتگن تروریزم تهدیدی اسلام آباد اوچون اېنگ جدّي خوفسیزلیک معمالریدن بیری اېکنینی تأکیدلهدی.
اسحاقدار بوگون (جمعه، ۲ اسد) قیرغیزستانده بۉلیب اۉتگن شانگهای همکارلیک تشکیلاتی تشقی ایشلر وزیرلری ییغیلیشیده سۉزگه چیقیب، «تحریک طالبان پاکستان» (تیتیپی)، «بلوچستان آزادلیک اوردوسی»، «شرقي تورکستان اسلامي حرکتی» و باشقه قوراللی گروهلر افغانستان توپراغیده طالبلر نظارتی و کۉمهگیده هنوزگچه جنگریلرنی یاللش، تیارلش و فعالیت یوریتیشده دوام اېتهیاتگنینی دعوا قیلدی.
پاکستان تشقی ایشلر وزیرینینگ ایتیشیچه، طالبلر اوشبو ترورچی تشکیلاتلر اوچون یرهتگن قولهی شرایط بیرلشگن ملتلر تشکیلاتینینگ چېکلاولر مانیتورینگ گروهی گزارشلریده هم قید اېتیلگن.
او، شونینگدېک، تینچ، برقرار، فراوان، منطقهگه انتیگراسیونلشگن و اۉز قۉشنیلری بیلن تینچ-تاتوو یشیدیگن افغانستان شانگهایگه اعضا برچه دولتلر منفعتیگه خدمت قیلیشینی، پاکستان اېسه دایما شوندهی افغانستاننی کۉریشنی ایستشینی بیلدیردی.
بیراق اسحاقدار برقرار تینچلیک، خوفسیزلیک و اقتصادي ترقیات فقط افغانستانده تروریزم ایلدیزی برطرف اېتیلگندهگینه تأمینلنیشینی تأکیدلهدی.
او شانگهای همکارلیک تشکیلاتینی طالباندن خلق ارا همجمعیت آلدیدهگی تروریزمگه قرشی مجبوريتلریگه رعایه اېتیشنی و خلقارا تینچلیک همده خوفسیزلیک بارهسیدهگی مسوولیتینی بجریشنی طلب قیلیشگه چقیردی.
طالبلر 2021-ییلده حاکمیتنی قۉلگه آلگنیدن بویان پاکستانده، اینیقسه خیبر پختونخوا و بلوچستان ایالتلریده خوفسیزلیک بیلن باغلیق وضعیت سېزیلرلی درجهده یامانلشگن.
پاکستان رسميلری مملکتگه اویوشتیریلهیاتگن هجوملر افغانستان توپراغیدن رېجهلشتیریلهیاتگنینی و طالبلر اولرگه علاقهدار قوراللی گروهلرنی قۉللب-قوّتلهیاتگنینی دعوا قیلیب کېلهدی.
طالبلر اېسه بو عیبلاولرنی رد اېتیب، افغانستان توپراغیدن هېچ بیر گروهنینگ باشقه دولتلرگه قرشی فایدهلنیشیگه یۉل قۉیمسلیگینی تأکیدلهماقده.
