پاکستان اوردوسی عصیانچیلرنینگ خوفسیزلیک پوستهسیگه اویوشتیرگن هجومی عاقبتیده ۱۵ کیشی، جملهدن۱۲ نفر حربي،۲ نفر پولیس و اۉرمان خوجهلیگی سابق خادیمی هلاک بۉلگنینی معلوم قیلدی.
پاکستان اوردوسی جماعتچیلیک بیلن علاقهلر بۉلیمی معلوماتیگه کۉره، هجوم بوگون (جمعه،۲ اسد) اېرتهلب خیبر پختونخوا ایالتینینگ تانک اولسوالیگیده صادر اېتیلگن. هجومدن کېینگی قوراللی تۉقنهشوولرده۱۲ نفر هجومچی هم اۉلدیریلگن.
اوردو نینگ بیاناتیده ایتیلیشیچه، هجومچیلر پاکستان خوفسیزلیک کوچلرینینگ قرشیلیگیگه دوچ کېلگچ، پارتلاوچی مادّهلر آرتیلگن موترنی پوسته دېواریگه اورگن. کوچلی پارتلش عاقبتیده پوسته تاسیساتیگه جدّي ضرر یېتگن و۱۵ کیشی جان بېرگن.
پاکستان اوردوسی اوشبو هجومنی هندستان قۉللب-قوّتلهیاتگن «فتنه الخوارج» گروهی بیلن باغلهدی. پاکستان رسميلری بو اتَمهنی عادتده تحریک طالبان پاکستان (تیتیپی) اوچون ایشلهتهدی.
سۉنگّی پیتلرده پاکستانده پارتلاوچی مادّهلر آرتیلگن موترلر یاردمیده عملگه آشیریلهیاتگن هجوملر سانی آرتگن.
آخرگی آیلرده هجومچیلر عیناً شو اصولدن فایدهلنیب، خیبر پختونخوا و بلوچستاندهگی پاکستان خوفسیزلیک پوستهلریگه بیر نېچه بار هجوم اویوشتیرگن.
پاکستان اوردوسی بو هجوملر افغانستان توپراغیدن رېجهلشتیریلهیاتگنینی دعوا قیلماقده. بیراق افغانستاندهگی طالبلر بو عیبلاولرنی رد اېتیب، پاکستان رسميلرینی مملکت خوفسیزلیگینی تأمینلهی آلمهسلیکده عیبلهماقده.
