محمد امین احمدی، سابق حکومتنینگ دوحه مذاکرهلریدهگی مذاکرهچی هیئتی اعضاسی، طالبلر رهبرلریگه بیر نېچه بار افغانستانده زۉروانلیک و حاکمیتنینگ یکّه قۉلگه آلینیشی اساسیده توزیلگن باشقروو آخر-عاقبت زۉروانلیک ایلنهسینی ینه کوچهیتیریشینی اېسلهتگنینی ایتدی.
احمدی بوگون (شنبه، ۳-اسد) فیس بوک صحیفهسیده شوندهی یازدی: «افغانستان کبی اوزاق دوام اېتهیاتگن مرکّب اجتماعي و اېتنیک ماجرالرگه دوچ کېلگن مملکتده زۉروانلیک همده بایلیک و حاکمیت منبعلرینی ماناپاللشتیریش اساسیده قوریلگن باشقروو برقرار تینچلیکنی تأمینلهمهیدی. اېرتهمی-کېچمی او ینگی زۉروانلیک ایلنهسینی یوزهگه کېلتیرهدی.»
اونینگ ایتیشیچه، بو مسألهنی بیر نېچه بار، جملهدن، ۲۰۲۲ییلده آسلو شهریده امیرخان متقي باشچیلیگیدهگی طالبلر هیئتی بیلن بۉلیب اۉتگن اوچرهشووده هم تأکیدلهگن.
احمدینینگ سۉزلریگه کۉره، اوشبو ییغیلیشده طالبلر اقتصاد وزیرلیگی وزیر اۉرینباسری عبدالطیف نظری، حقّاني ترماغینینگ یوقاری مرتبهلی اعضاسی انس حقّاني همده طالبلر عدلیه وزیری عبدالحکیم شرعي هم اشتراک اېتگن.
اونینگ قۉشیمچه قیلیشیچه، «انس حقّاني مېنینگ سۉزلریمنی دقّت بیلن تینگلر، بعضاً حتا قیدلر هم آلیب بارردی. اما عبدالحکیم شرعی اېسه گۉیاکه متعصبلیک و عداوت تمثالیگه اۉخشب کۉرینردی.»
محمدامین احمدی، بیلیم یورتی پروفیسوری صفتیده، افغانستان سابق جمهوریتی حکومتی و طالبلر اۉرتهسیدهگی دوحه مذاکرهلریده حکومت مذاکرهچی هیئتی اعضاسی بۉلیب قتنهشگن. او حاضر «زۉروانلیکسیز قرشیلیک» غایهسی نینگ طرفدارلریدن بیری بۉلیب، بو موضوعده کتاب هم یازگن.
