محلي منبعلرنینگ معلوم قیلیشیچه، دایکندی ولایتینینگ سنگ تخت و بندر اولسواللیگیده بیر ییگیت بیلن قاچیب کېتماقچی بۉلگن یاش قیز آتهسی تامانیدن اۉلدیریلگن.
منبعلرگه کۉره، قیز سنگ تخت و بندر اولسواللیگینینگ «سیاهخرک وترمه»ی قیشلاغیده یشهگن. او ایکّی کون اوّل آتهسی تامانیدن (چرهای) بیلن آتیب اۉلدیریلگن.
بیر منبع اطلاعات روزگه ایتیشیچه، قیز تاجیک ملتیگه منسوب بیر ییگیت بیلن کابل تامان قاچیب کېتماقچی بۉلگن. بیراق اولر سنگ تخت و بندر بازاری منطقهسیده موترگه چیقهیاتگن پیتده تنیب قالینگن. منبعنینگ ایتیشیچه، ییگیت دایکندی ولایتیدن اېمس، بلکه قیزنی آلیب کېتیش اوچون بو ولایتگه کېلگن.
منبعنینگ سۉزلریگه کۉره، قیز و ییگیت انیقلنگچ، اوّل طالبلر بۉلیمیگه آلیب باریلگن، کېین اېسه قیز عایلهسیگه تاپشیریلگن.
منبع قیز اۉشه کېچهنی آتهسینینگ اوییده اۉتکزگنینی، اېرتهسی کونی اېرتهلب اېسه آتهسی اونی چرهای بیلن آتیب اۉلدیرگنینی ایتدی. منبع قیزنینگ آتهسی صفدر اېکنینی بیلدیریب، اونینگ اۉزی طالبلر بۉلیمیگه باریب، قیزینی اۉلدیرگنینی تن آلگنینی قۉشیمچه قیلدی. منبعلرگه کۉره، حاضرده اوشبو شخص سنگ تخت و بندر اولسواللیگی مرکزیده طالبلر حبسیده سقلنماقده.
دایکندی ولایتیده یاش قیزلرنینگ، اساسن نکاح قوریش مقصدیده، ییگیتلر بیلن قاچیب کېتیشی عادتي حالگه ایلنگنی ایتیلماقده.
مجبوري نکاحلر همده عایلهلر تامانیدن قیز و ییگیتلرنینگ راضیلیگی انابتگه آلینمسلیگی بوندهی قاچیشلرنینگ اساسي سببلریدن بیری صفتیده کۉرسهتیلماقده.
طالبلر بوندهی حالتلرنی «اویدن قاچیش» دېب بهالهیدی و اونی جنایت دېب اعلان قیلگن. اوشبو گروه اویدن قاچیشده عیبلنگن شخصلرنی عامه آلدیده قمچیلش بیلن جرالهیدی.
