«افغانستان آزادلیک جبههسی» اۉز کوچلری بدخشان ولایتینینگ زیباک اولسواللیگی آسمانیده حربي عملیات آلیب بارهیاتگن طالبلرنینگ ایکّی حربي درونینی نشانگه آلیب، اوریب توشیرگنینی دعوا قیلدی.
جبهه بیاناتیگه کۉره، اوشبو ایکّی درون بوگون (شنبه،۳اسد) توش پیتی زیباک اولسواللیگیده اۉز نظارتیدهگی حدود اوزره اوریب توشیریلگن.
«افغانستان آزادلیک جبههسی» شونینگدېک، کېچه کېچقورون طالبانگه یاردم کوچلرینی آلیب کېلهیاتگن تیک اوچرلرنینگ زیباک اولسواللیگیده قۉنیشیگه تۉسقینلیک قیلگنینی هم معلوم قیلدی.
جبهه بیاناتیده ایتیلیشیچه، «تیک اوچرلر قۉشیمچه کوچلرنی جایلشتیریشگه اورینگن پیتده جنگچیلریمیزنینگ کوچلی ضربهلریگه اوچرهدی و آرتگه چېکینیب، منطقهنی ترک اېتیشگه مجبور بۉلدی.»
جبههنینگ بیلدیریشیچه، او پنجشنبه کونی اېرتهلبدن باشلب بیر نېچه یۉنهلیشدن زیباک اولسواللیگیده طالبلرگه قرشی حربي عملیاتنی باشلهگن و اولسواللیکنینگ اَیریم حدودلرینی اۉز نظارتیگه آلگن.
جبهه کېچه بېرگن بیاناتیده هجوملر نتیجهسیده۲۱ نفر طالبلر اعضاسی هلاک بۉلگنی، ینه 37 نفری یرهلنگنینی دعوا قیلگن.
طالبلر هم زیباک اولسواللیگیدهگی تۉقنهشوولرنی تصدیقلهگن، بیراق واقعهلر یوزهسیدن باشقهچه معلومات بېرگن.
طالبلرنینگ «۲۱۹-عمر ثالیث فرقهسی» بیاناتیگه کۉره، جنگ زیباک اولسواللیگینینگ تۉپخانه حدودیده یوز بېرگن. اونده پاکستاننینگ چترال ولایتیدهگی شاه سلیم حدودیدن کیریب کېلگن بېش نفر «عصیانچی» اۉلدیریلگن، قالگنلری اېسه ینه چترالگه قاچیب کېتگن.
سۉنگّی پیتلرده بدخشان ولایتی طالبلرگه قرشی قوراللی گروهلرنینگ هجوملریگه گواه بۉلماقده.
بوندن آلدین «سپاهیان میهن» دېب ناملنگن گروه بدخشاننینگ یفتل اولسواللیگیگه هجوم قیلیب، اوشبو اولسواللیکنی بیر نېچه ساعت دوامیده طالبلر نظارتیدن چیقرگن اېدی.
بو ۲۰۲۱-ییلده طالبلر حاکمیتگه قَیتگنیدن بېری ایلک بار بیر اولسواللیک نظارتی اوشبو گروه قۉلیدن چیققنی صفتیده قید اېتیلگن.
