افغانستانلیک ژورنالیست و رخشانه یېتکرمهسی مسوولی زَهرا جویانینگ «کابلنینگ غایب بۉلگن قیزی» ناملی کتابی بویوک بریتانیانینگ لندن شهریده تقدیم اېتیلدی.
کتاب تقدیماتی پنجشنبه کونی (۱اسد) لندننینگ مشهور «دانت بوکس» کتاب دوکانیده مؤلف همده ینه ۱۲۰نفر مهمان اشتراکیده بۉلیب اۉتدی.
زَهرا جویا مراسمده شوندهی دېدی: ««کابلنینگ غایب بۉلگن قیزی» فقط مېنینگ حیاتیم حقیدهگی حکایه اېمس. بو کتاب افغانستان عیاللرینینگ یشیرین و ایتیلمهگن تاریخینی حجتلشتیریشگه قرهتیلگن اورینیشدیر. اوروش، مهاجرلیک، کمسیتیش و اونوتیلیش آرهسیده یۉقالیب کېتگن آوازلر ینه اېشیتیلیشی اوچون یازیلدی.»
او ینه شوندهی قۉشیمچه قیلدی: «مېن بو کتابده شخصي خاطرهلرنینگ صمیميلیگی و چوقورلیگینی سوریشتیروو گزیتهچیلیکنینگ دالضربلیگی همده انیقلیگی بیلن اویغونلشتیریشنی ایستهدیم.»
جویا کتاب جنسیت اساسیدهگی ظلمنینگ اچّیق حقیقتلرینی آچیب بېریشینی، بوندهی ظلم نهفقط افغانستانده، بلکه دنیانینگ باشقه حدودلریده هم دوام اېتهیاتگنینی تأکیدلهدی.
کتاب نفوذلی مکافاتلرگه سزاوار ژورنالیست امی «امی فریس راتمن» بیلن همکارلیکده یازیلگن.
راتمن اوزاق ییللر افغانستاندن راپورتاژلر تیارلهگن و رخشانه یېتکرمه کېنگشی اعضاسی حسابلنهدی.
283 صحیفهدن عبارت اوشبو کتاب انگلیس تیلیده یازیلگن بۉلیب، «رابینسون» نشریاتی تامانیدن چاپ اېتیلگن. مؤلف نینگ ایتیشیچه، کتاب یقین کېلهجکده باشقه تیللرگه هم ترجمه قیلینهدی.
زهرا جویا افغانستان نینگ تنیقلی ژورنالیستلریدن بیری و رخشانه یېتکرمه مسوولی حسابلنهدی. طالبلر ۲۰۲۱-ییلده حاکمیتنی قَیته اېگهلهگنیدن سۉنگ او افغانستاننی ترک اېتگن و حاضر بویوک بریتانیا یشهیدی.
او افغانستاننینگ باميان ولایتیده توغیلگن و فعالیتی دوامیده اطلاعات روز گزېتهسیده هم ایشلهگن.
