افغانستان آزادلیک جبههسی کابلدن بدخشان تامان حرکتلنهیاتگن طالببز حربي کاروانی بغلان ولایتینینگ دۉشی اولسواللیگیده هجومگه اوچرهگنینی معلوم قیلدی.
جبهه بیاناتیگه کۉره، هجوم تیناوون شنبه (۳ اسد) کونی عملگه آشیریلگن. اونده یېتّی کیشی طالبلر اعضاسی اۉلدیریلگن، ینه آلتی نفری یرهلنگن.
بیاناتده ایتیلیشیچه، مذکور کاروان بدخشانگه قۉشیمچه کوچلر و حربي تخنیکلرنی آلیب کېتهیاتگن بۉلگن.
«افغانستان آزادلیک جبههسی» عملیات دوامیده اۉز کوچلریدن هېچ کیم زیان یېتمهگنینی تأکیدلهدی.
کېچه تونده اَیریم محلي عامهوي اخبارات واسطهلری محلي منبعلرگه تهیهنیب، بغلان ولایتینینگ دۉشی اولسواللیگیدهگی کابل-بلخ عمومی قتناو یۉلیده قوراللی تۉقنهشوو صادر بۉلگنینی خبر قیلگن اېدی.
بیراق طالبلر حاضرچه اوشبو حادثه یوزهسیدن هېچ قندهی ایضاح بېرمهگن.
«افغانستان آزادلیک جبههسی» جمعه کونی هم بدخشان ولایتی نینگ زیباک اولسواللیگیدهگی طالبان موضعلریگه هجوم اویوشتیرگنینی و اونده ۲۱ نفر طالبان اعضاسی اۉلدیریلگنینی دعوا قیلگن اېدی.
شوندن سۉنگ طالبلر اوشبو اولسوالیککه قۉشیمچه کوچلر یوباردی. گروه اوردوسی باشلیغی فصیح الدین فطرت هم زیباک اولسواللیگیگه سفر قیلگن.
