طالبلر باش وزیری ملا محمد حسن آخوند اۉزبېکستان باش وزیری اۉرینباسری جمشید خواجهیف بیلن اوچرهشیب، ایکّی دولت اۉرتهسیدهگی سیاسي و اقتصادي همکارلیکنی مستحکملش مسألهلرینی بحث قیلدی.
طالبلر باش وزیری ادارهسی ترقهتگن بیاناتگه کۉره، اوچرهشوو بوگون (یکشنبه، ۴اسد) اېرتهلب کابلدهگی ارگ سراییده بۉلیب اۉتگن.
بیاناتگه کۉره، جمشید خواجهیف افغانستانگه تشریفیدن مقصد ایکّی مملکت اۉرتهسیدهگی اقتصادي و سیاسي علاقهلرنی کېنگهیتیریش همده مستحکملش اېکنینی تأکیدلهگن.
طالبلر باش وزیری ادارهسی کېلتیرگن معلوماتگه کۉره، اۉزبېکستان باش وزیری اۉرینباسری افغانستان اۉزبېکستان تشقی سیاستیده مهم اۉرین توتیشینی، کابلگه تشریفینینگ اساسي مقصدی اېسه تجارت و سودا ساحهسیده ایکّی دولت اۉرتهسیده اېریشیلگن کېلیشوولرنی عملي باسقیچگه آلیب چیقیش اېکنینی ایتگن.
جمشید خواجهیف نینگ معلوم قیلیشیچه، ۲۰۲۵-ییلده افغانستان نینگ اۉزبېکستانگه صادراتی۱۵۰ میلیون امریکا دالریگه یېتگن. جاري ییلده اېسه بو کۉرسهتکیچ حاضرگچه ۱۱۱میلیون امریکا دالرینی تشکیل اېتگن و ییل آخریگچه ینه-ده آشیشی کوتیلماقده.
او، شونینگدېک، اۉزبېکستان شو کونگچه افغانستان وطنداشلریگه 5 مینگته ویزه بېرگنینی بیلدیریب، بو ایکّی دولت اۉرتهسیدهگی دۉستلیک و اقتصادي علاقهلر رواجلنهیاتگنیدن دلالت بېریشینی قید اېتدی.
ملا محمد حسن آخوند اۉزبېکستان هیاتینینگ افغانستانگه تشریفینی مهم واقعه و «اۉزبېکستاننینگ افغانستان کېلهجگیگه بۉلگن مستحکم ایشانچی» بېلگیسی صفتیده بهالهدی.
او طالبلر اۉزبېکستان بیلن علاقهلرنی رواجلنتیریشدن ممنون اېکنینی همده اۉز ذمّهسیگه آلگن مجبوريتلرنی بجریشگه صادق قالیشینی تأکیدلهدی.
جمشید خواجهیف تیناوون حکومت و خصوصي سکتور وکیللریدن عبارت هیئت باشچیلیگیده کابلگه یېتیب کېلگن اېدی.
او طالبلر رسميلری بیلن اوچرهشوولردن تشقری، افغانستانده اۉتکزیلهدیگن بیزنس فرومیده هم اشتراک اېتیشی رېجهلشتیریلگن.
