«افغانستان آزادلیک جبههسی» بدخشان ولایتینینگ زیباک اولسواللیگیده اۉز کوچلری بیلن طالبلر اۉرتهسیدهگی اوروش دوام اېتهیاتگنینی معلوم قیلدی.
(جبهه) بوگون (یکشنبه، ۴-اسد) ایکس اجتماعي ترماغیده نشر قیلگن ویدېوده طالبلر کوچلری «آزاد اېتیلگن حدودلر»دن چېکینیشگه مجبور بۉلگنینی ادعا قیلگن.
شونینگدېک (جبهه) طالبلر زیباک اولسواللیگی مرکزیدهگی پوستهلری اطرافیده ماینلر اۉرنهتگنینی هم بیلدیرگن.
«افغانستان آزادلیک جبههسی» و طالبلر اۉرتهسیدهگی تۉقنهشوولر اۉتگن هفته پنجشنبه کونی اېرتهلبدن بویان دوام اېتماقده.
جبهه جمعه کونی بۉلیب اۉتگن بیاناتیده جنگلرده طالبان نینگ۲۱ اعضاسی اۉلدیریلگنی، ینه۳۷نفری یرهلنگنینی ادعا قیلگن.
جبهه شو پیتگچه اۉز صفیدن بیر جنگچی اۉلدیریلگنینی هم تصدیقلهگن.
طالبلر هم بدخشان نینگ زیباک اولسواللیگیدهگی تۉقنهشوولرنی تصدیقلهگن، بیراق واقعهلر یوزهسیدن باشقهچه تلقیننی ایلگری سورگن.
طالبلرنینگ۲۱۹عمر ثالث فرقهسی بیاناتیگه کۉره، جنگ زیباک اولسواللیگینینگ تۉپخانه حدودیده صادر بۉلگن. اونده پاکستان نینگ چترال ولایتیدهگی شاه سلیم حدودیدن کیریب کېلگن بېش «عصیانچی» اۉلدیریلگن، قالگنلری اېسه ینه چترالگه قاچیب کېتگن.
طالبلر حاضرگچه زیباک اولسواللیگیده «افغانستان آزادلیک جبههسی» بیلن جنگلر دوام اېتهیاتگنینی تصدیقلهمهگن.
سۉنگگی پیتلرده بدخشان ولایتی طالبانگه قرشی قوراللی گروهلرنینگ هجوملریگه گواه بۉلماقده.
بوندن آلدین «سپاهیان میهن جبههی» دېب ناملنووچی گروه بدخشاننینگ یفتل اولسواللیگیگه هجوم قیلیب، بیر نېچه ساعت دوامیده اولسواللیک نظارتینی طالبلر قۉلیدن چیقریشگه موفق بۉلگن اېدی.
بو ۲۰۲۱-ییلده طالبان حاکمیتگه قَیتگنیدن بویان ایلک بار بیر اولسواللیک نظارتی اوشبو گروه قۉلیدن چیققن حالت صفتیده قید اېتیلگن.
