رواداری انسان حقوقلری تشکیلاتینینگ معلوم قیلیشیچه، پاکستان طالبلر بیلن قوراللی تۉقنهشوولر دوامیده تینچ اهالینی حمایه قیلیش نینگ اساسي تمایللرینی بوزیب، خصوصي اویلر و جماعت آستقورمهلریگه هجوم قیلگن. مذکور هجوملر عاقبتیده کمیده بیر مینگ 187 نفر تینچ اهالی هلاک بۉلگن یاکه یرهلنگن، 394 ته تورر جای ویران قیلینگن همده 29 مینگ کیشی اۉز اویینی ترک اېتیشگه مجبور بۉلگن.
تشکیلات نینگ 2024-ییل دسامبریدن 2026-ییل جونیگچه بۉلگن دورنی قمرهب آلگن ینگی تدقیقات حساباتی بوگون (دوشنبه، 5-اسد) اعلان قیلیندی.
گزارشگه کۉره، پاکستان سۉنگگی قریب بیر یریم ییل دوامیده پکتيا، پکتیکا، خۉست، نورستان، کنر، ننگرهار، قندهار، هلمند و کابل ولایتلریگه هجوملر اویوشتیرگن. نتیجهده 472 نفر تینچ اهالی هلاک بۉلگن، 715 نفری اېسه یرهلنگن.
گزارشده قید اېتیلیشیچه، هلاک بۉلگنلر آرهسیده 342 اېرکک، 86 نفر باله و 44 عیال، یرهدارلر آرهسیده اېسه 460 اېرکک، 130 نفر باله و 125 عیال بار.
هجوملر توری
رواداری معلوماتیگه کۉره، پاکستان حربيلری افغانستانگه قرشی 50 گه یقین هوا، قوروقلیک-راکت و ارهلش هوا-قوروقلیک هجوملرینی عملگه آشیرگن.
حساباتده قید اېتیلیشیچه، حجتلشتیریلگن 50 ته هجوم نینگ 19 تهسی (تخمیناً 38 فایزی) هوا هجوملری بۉلیب، اولر اساسن جنگاور اوچاقلر و قوراللنگن درونلر یاردمیده اویوشتیریلگن.
شونینگدېک، 28 ته هجوم (تخمیناً 56 فایز) قوروقلیکدن راکت و ارتیلّیریه ضربهلری کۉرینیشیده عملگه آشیریلگن. اوشبو هجوملر پاکستان حربيلری نینگ چېگره حدودلریدهگی موضعلریدن راکت، راکت سناریدلری، مینامیات و باشقه حربي قورال-اسلحهلر یاردمیده عملگه آشیریلگن.
روادارینینگ انیقلشیچه، اوچته حالتده (تخمیناً 6 فایز) هوا و قوروقلیک هجوملری بیر وقت نینگ اۉزیده یاکه کېتمه-کېت عملگه آشیریلگن. بوندهی هجوملر کنر ولایتی نینگ اسداباد شهری و سرکانو اولسواللیگی شونینگدېک، قندهار ولایتینینگ سپین بولدک اولسواللیگیده قید اېتیلگن.
هجوملر عملگه آشیریلگن وقت
رواداری معلوماتیگه کۉره، حجتلشتیریلگن واقعهلر تحلیلی پاکستان حربيلری اویوشتیرگن 31 ته هجوم اېرته تانگده یاکه یریم تونده، یعنی محلي اهالی اویلریده بۉلگن یاکه اوخلهیاتگن پیتده صادر اېتیلگنینی کۉرسهتهدی.
تشکیلات نینگ بیلدیریشیچه، کمیده تۉرت حالتده قیسقه وقت آرهلیغیده بیر حدود بیر نېچه بار نشانگه آلینگن. اَیریم حاللرده دستلبکی ضربهدن سۉنگ کېینگی هجوملر تینچ اهالی حدودنی ترک اېتیشگه یاکه یرهدارلرنی خوفسیز جایگه آلیب چیقیشگه اورینهیاتگن وقتده عملگه آشیریلگن.
آلدیندن آگاهلنتیریشسیز هجوملر
رواداری نینگ معلوم قیلیشیچه، پاکستان حربيلری خلقارا انسان پرورلیک حقوقده قوراللی ماجرا تامانلری ذمّهسیگه یوکلهتیلگن اساسي مجبوريتلردن بیری بۉلگن تینچ اهالینی حمایه قیلیش بۉییچه ضرور احتیاط چارهلرینی کۉرمهگن. تشکیلاتگه کۉره، بو حالت تینچ اهالی آرهسیدهگی قربانلر سانی نینگ آرتیشیگه آلیب کېلگن.
تشکیلات فقرالر بیلن اۉتکزیلگن صحبتلرگه تهیهنیب، تۉپلنگن دلیل و معلوماتلر کۉپلب حالتلرده حربي عملیات باشلنیشیدن آلدین محلي اهالی و تینچ فقرالرگه هېچ قندهی آلدیندن آگاهلنتیریش یاکه ثمرهلی خبرنامه بېریلمهگنینی کۉرسهتیشینی قید اېتگن.
حساباتگه کۉره، تدقیقات دایرهسیده صحبت اۉتکزیلگن 21 نفر رېسپاندېنت هجوملردن آلدین هېچ قندهی آگاهلنتیریش یاکه معلومات آلمهگنینی بیلدیرگن. شو سببلی تینچ اهالی حدودنی ترک اېتیش یاکه خوفسیز جایگه باشپناه تاپیش اوچون یېترلی امکانیتگه اېگه بۉلمهگن.
فقط بیر نفر مصاحبه بېرگنلر، دولت ادارهسیده کونلیک ایشچی بۉلیب ایشلهگن شخص، پاکستان حربي اوچاقلری کۉرینگن پیتده مسووللر تامانیدن آلدیندن آگاهلنتیریلگنینی ایتگن.
هجوملر نشانی حربي تاسیساتلردن اوزاقده بۉلگن
حساباتده ایتیلیشیچه، صحبتداشلر و باشقه محلي منبعلردن تۉپلنگن معلوماتلر کۉپلب حاللرده پاکستان حربي هجوملری حربي تاسیساتلری یاکه موضعلردن انچه اوزاقده جایلشگن حدودلرگه قیلینگنینی کۉرسهتهدی.
تدقیقاتده اشتراک اېتگن 17 نفر مصاحبه بېرگنلر هجوملر صادر بۉلگن جایلر یقینیده هېچ قندهی معلوم حربي پایگاه یاکه حربي انشاات موجود بۉلمهگنینی بیلدیرگن.
حساباتگه کۉره، پاکستان نینگ پکتيا، پکتیکا، کنر، خۉست، نورستان، ننگرهار، قندهار و هلمند ولایتلریدهگی هجوملری عاقبتیده 29 مینگ کیشی اۉز اویینی ترک اېتیشگه مجبور بۉلگن و ایچکی کۉچکینگه ایلنگن.
کابلدهگی معتادلرنی دوالش مرکزیگه هوا هجومی
رواداری نینگ معلوم قیلیشیچه، پاکستان حربي مقصد صفتیده کۉرسهتگن کابلدهگی “امید” گیاهوندلیکدن دوالش مرکزی اصلیده فقرالیک تاسیسات بۉلگن و هجوم قربانلری نینگ برچهسی تینچ اهالی وکیللری اېدی.
حساباتده قید اېتیلیشیچه، مذکور هجوم عاقبتیده حسابات تیارلنگن وقتگه قدَر کمیده 204 نفر اېرکک هلاک بۉلگن، 96 کیشی، جملهدن بیر عیال، یرهلنگن.
تشکیلات نینگ تأکیدلشیچه، کابل شهریدهگی 10 ته شفاخانه، جملهدن طب عدلی مؤسسهسیدن آلینگن معلوماتلر قربانلر و یرهدارلر نینگ اکثریتی اوشبو مرکزنینگ بېمارلری، مراجعتچیلری و خادملری بۉلگنینی کۉرسهتهدی.
اوّلراق بیرلشگن ملتلر تشکیلاتی نینگ افغانستاندهگی یاردم اداره سی (یوناما) اوشبو هجوم عاقبتیده 269 کیشی هلاک بۉلگنی و 122 کیشی یرهلنگنی حقیده معلوم قیلگن اېدی. رواداری اېسه پارتلشلرنینگ کوچی، ویرانهگرچیلیک کۉلمی همده اَیریم شخصلر نینگ بېدرَک یۉقالگنی سببلی قربانلر نینگ یکوني سانی حاضرگچه انیقلنمهگنینی بیلدیرگن.
تورر جایلر و جماعت آستقورمهلری ویران قیلینگن
گزارشگه کۉره، پاکستان هجوملری عاقبتیده کمیده 394 ته تینچ اهالیگه تېگیشلی تورر جای تۉلیق یاکه قسماً ویران بۉلگن. شوندن 170 تهسی پکتیکا، 104 تهسی کنر، 57 تهسی قندهار، 53 تهسی خۉست، 6 تهسی ننگرهار، 3 تهسی پکتيا ولایتلریده همده 1 تهسی کابل شهریده جایلشگن.
شونینگدېک، حساباتده قید اېتیلیشیچه، 22 ته مکتب، 1 ته شفاخانه، 1 ته کلینیک، 11 ته مسجد، 46 ته دوکان و 10 ته موتر سودا مرکزی پکتيا، پکتیکا، خۉست، کنر، ننگرهار، قندهار ولایتلری همده کابل شهریدهگی هجوملر عاقبتیده تۉلیق ویران بۉلگن یاکه قسماً ضرر کۉرگن.
بیرلشگن ملتلر تشکیلاتی نینگ انسان پرور مسألهلرنی موافقلشتیریش اداره (اوچا) معلوماتیگه کۉره، فقرالیک آستقورمهلرگه قیلینگن هجوملر نتیجهسیده 19 ته ساغلیقنی سقلش مرکزی فعالیتینی وقتینچه تۉختهتگن یاکه خدمتلرینی چېکلهگن. نتیجهده 78 مینگگه یقین کیشی طبي خدمتلردن فایدهلنیش امکانیتیدن محروم بۉلگن.
بوندن تشقری، کنر و ننگرهار ولایتلریده 13 مینگدن آرتیق اۉقووچی تعلیم جریانی نینگ ایزدن چیقیشی عاقبتیده اۉقیشیده اوزیلیشلرگه دوچ کېلگن.
