طالبلرنینگ صنعت و تجارت وزیرلیگینینگ معلوم قیلیشیچه، افغانستان و اۉزبېکستان تجارلری۲۰۰ میلیون امریکا دالریدن آرتیق قیمتدهگی۲۲ته کېلیشوونی امضالهگن.
وزیرلیک دوشنبه کونی (۵-اسد) بیلدیرگنیدېک، مذکور حجتلر کابلده بۉلیب اۉتگن «افغانستان-اۉزبېکستان بیزنس فورمی» دایرهسیده امضالنگن.
بیراق وزیرلیک کېلیشوولرنینگ مضمونی و قَیسی ساحهلرنی قمرهب آلیشی حقیده قۉشیمچه معلومات بېرمهگن.
طالبلر نینگ صنعت و تجارت وزیری نورالدین عزیزی فرومده سۉزگه چیقیب، افغانستان و اۉزبېکستان اۉرتهسیدهگی سودا حجمینی 5 میلیارد امریکا دالریگه یېتکزیشگه امید بیلدیردی.
اونینگ تأکیدلشیچه، بو مقصدگه ایکّی تامان اقتصادي و سودا همکارلیگینی رواجلنتیریش یۉلیده بیرگهلیکده حرکت قیلگن تقدیردهگینه اېریشیش ممکن.
عزیزی نینگ ایتیشیچه، افغانستاندن اۉزبېکستانگه تجربه طریقهسیده۱۰ مینگ تُن پخته صادر قیلینگن. اېندیلیکده اۉزبېکستان افغانستاندن ینه۱۰۰ مینگ تُنگچه پخته خرید قیلیش مجبوريتینی آلگن.
فورومده اۉزبېکستان باش وزیری اۉرینباسری جمشید خۉجهیف هم نطق سۉزلب، ایکّی دولت اۉرتهسیدهگی سودا و اقتصادي همکارلیکنی ینه-ده رواجلنتیریش اوچون قولهی شرایط یرهتیش مهملیگینی تأکیدلهدی.
جمشید خۉجهیف ایکّی کون اوّل دولت و خصوصي سکتور وکیللریدن عبارت هیئت باشچیلیگیده کابلگه تشریف بویورگن اېدی. طالبلر معلوماتیگه کۉره، هیئت ترکیبیده۳۰۰کیشی اۉزبېکستانلیک تدبیرکار هم بار.
تشریف دوامیده هیئت طالبلرنینگ یوقاری مرتبهلی رسميلری بیلن اقتصاد و سودا ساحهلریده ایکّی تامانلهمه علاقهلرنی کېنگهیتیریش همده اۉز ارا مجبوريتلرنی عملگه آشیریش مسألهلرینی محاکمه قیلگن.
