بیرلشگن ملتلر تشکیلاتینینگ افغانستاندهگی یاردم ادارهسی (یوناما) اۉزینینگ ینگی گزارشیده افغانستانده سۉز اېرکینلیگی همده عامهوي اخبارات واسطهلری و ژورنالیستلرنینگ فعالیتی طالبلر تامانیدن قۉییلگن چېکلاولرگه دوچ کېلیشده دوام اېتهیاتگنینی معلوم قیلدی. گزارشگه کۉره، اوچ آی ایچیده۱۰ ته یېتکرمه فعالیتینی تۉختهتگن، ۴ خبرچی اېسه حبسگه آلینگن.
یوناما معلوماتیگه کۉره، ۱-اپریلدن جون آیی آخریگچه طالبلر استخباراتی تامانیدن تۉرت ژورنالیست حبسگه آلینگن. شونینگدېک، اوچته یېتکرمه طالبلر قراری بیلن، ینه یېتّیته یېتکره اېسه فعالیتینی سقلب قالیش اوچون ضرور مالی مجبوريتلرنی بجره آلمهگنی سببلی اۉز فعالیتینی تۉختهتگن. بیر یېتکرمه اېسه رهبریتینی اۉزگرتیرگچ، نشرات فعالیتینی قَیته تیکلشگه موفق بۉلگن.
گزارشده قید اېتیلیشیچه، ۱۱-اپریل کونی خوست شهریده طالبلرنینگ اخبارات و مدنیت ریاستی همده تعلیم باشقرمهسی «لونگ» رادیوسینینگ تعلیم دستورلرینی اۉقوو دستوریگه ماس اېمس، دېگن اساس بیلن تۉختهتگن.
شونینگدېک، ۱۷-می کونی باميان شهریده طالبلرنینگ استخبارات ادارهسی «باميان رادیوسی» فعالیتینی «ایشلش جوازیگه اېگه اېمس» دېگن عیبلاو بیلن تۉختهتیشنی بویورگن. مذکور رادیو ۲۳-جون کونی اۉز فعالیتینی قَیته باشلهگن.
یوناما معلوماتیگه کۉره۲۱جون کونی طالبلرنینگ اخبارات و مدنیت وزیرلیگی «راه فردا» تلویزیونیگه ملکدار و باش محرر المشتیریلگنیدن سۉنگ نشراتنی قَیته تیکلشگه رخصت بېرگن. اوشبو تلویزیون جاري ییل ۲۸-فبروری کونی اونینگ اېگهسی محمد محققنینگ بیاناتلری سبب فعالیتدن چېتلهتیلگن اېدی.
یونامانینگ بیلدیریشیچه، شو دورده قندهار و غزنی ولایتلریدهگی کمیده یېتّیته رادیواستیشن مالي مجبوريتلرنی بجره آلمهگنی همده جواز آلیش و سقلش بیلن باغلیق باشقه طلبلرنی ادا اېته آلمهگنی سببلی فعالیتینی دوام اېتتیره آلمهگن.
یوناما انسان حقوقلری بۉلیمی می آییده کابلده طالبلرنینگ استخباراتی ایکّی علیحده حالتده اوچ ژورنالیستنی حبسگه آلگنینی حجتلشتیرگن.
گزارشده ژورنالیستلرنینگ تقدیری حقیده باتفصیل معلومات بېریلمهگن. بیراق می آییده پېیگرد اخبارات آژانسی خبرچیسی جاوید نیازي همده طلوع نیوز ژورنالیستلری منصور نیازي و عمران دانش حبسگه آلینگن اېدی. طلوع نیوز ژورنالیستلری ۲۶می، جاوید نیازي اېسه ۷-جولای کونی آزاد قیلینگن.
یوناما جاوید نیازي و پېیگرد اخبارات آژانسی نامینی تیلگه آلمهگن حالده، ۴-می کونی کابلده طالبلر استخبارات ریاستی خادملری بیر اخبارات آژانسی ادارهسیده تینتوو اۉتکزیب، مبایل تېلفونلر، کامرهلر، کامپیوتېرلر و حجتلرنی مصادره قیلگنینی بیلدیرگن. ۵-می کونی خبرگزارلیک باشلیغی سۉراققه چقیریلیب حبسگه آلینگن و ۷-جولای کونی آزاد اېتیلگن.
