بیرلشگن ملتلر تشکیلاتینینگ افغانستاندهگی یاردم ادارهسی (یوناما) اۉزینینگ ینگی گزارشیده طالبلر سۉنگّی اوچ آی ایچیده بدخشان ولایتیده اسماعیلی شیعهلرگه تېگیشلی ۳۰ دن آرتیق جماعتخانهنی یاپگنینی معلوم قیلدی.
بوگون (سهشنبه، ۶-اسد) نشر قیلینگن گزارشگه کۉره، زیباک اولسواللیگیده کمیده ۱۷ ته، اشکاشیم اولسواللگیده ۱۴ ته و واخان اولسواللیگیده ۲ ته جماعتخانه یاپیلگن.
یوناما معلوماتیگه کۉره، اوشبو عبادت مسکنلری طالبان نینگ «امر به معروف و نهی از منکر» خادملری، اَیریم حاللرده اېسه گروهنینگ باشقه ادارهلری همکارلیگیده یاپیلگن. اسماعیلی شیعهلرگه بو جایلردن فایدهلنمسلیک بویوریلگن.
گزارشده ایتیلیشیچه، طالبلر بونگه سبب صفتیده جماعتخانهلرده محراب موجودلیگینی کۉرسهتیب، اولر مسجد صفتیده فایدهلنیلیشی کېرهکلیگینی بیلدیرگن.
طالبلر تشقی ایشلر وزیرلیگی یوناما گزارشگه جوابن جماعتخانهلرنینگ حالتی بیر خیل اېمسلیگینی تأکیدلهگن. وزیرلیککه کۉره، اَیریم بنالر ایلگری مسجد بۉلگن، باشقهلری اېسه تورر جای یاکه عبادتدن باشقه مقصدلرده فایدهلنیلگن.
وزیرلیک هر بیر حالت بۉییچه علیحده اداری قرار قبول قیلینگنینی قۉشیمچه قیلگن.
طالبان افغانستانده حاکمیتنی قَیته اېگهلهگنیدن بویان مملکتدهگی اسماعیلي شیعهلرگه نسبتاً باسیمنی کوچهیتیرگن. یونامانینگ اوّلگی گزارشلریگه کۉره، طالبلر اَیریم اسماعیلي شیعهلرنی اۉز اعتقادیدن واز کېچیب، حنفی مذهبیگه اۉتیشگه مجبور قیلگن.
