طالبلرنینگ خوست ولایتی والیسی ادارهسی ولایت مرکزیده فعال حالتده بۉلگن ایکّیته «استارلینک» اینترنت قوریلمهسی انیقلنیب، مصادره قیلینگنینی معلوم قیلدی.
خوست حاکمینینگ مطبوعات سۉزلاوچیسی مستغفر گربز بوگون (پنجشنبه،۸ اسد) ایکس اجتماعي ترماغیده یازیشیچه، اوشبو قوریلمهلر خوست شهری الفلاح مارکیتیدهگی زرکشان اینترنت شرکتیدن تاپیلیب، مصادره قیلینگن.
اونینگ قۉشیمچه قیلیشیچه، مذکور ایش یوزهسیدن اوچ کیشی هم حبسگه آلینگن.
طالبلرنینگ خوستدهگی رسميلری گروهنینگ قانون و کۉرسهتمهلریگه موافق، افغانستانده «استارلینک» اینترنتیدن فایدهلنیش تعقیقلنگنینی ایتدی.
یوقاری تېزلیکدهگی صنعي یۉلداش انترنتی «استارلینک» «اسپیسایکس» شرکتی آرقهلی ایلان ماسک تامانیدن تقدیم اېتیلهدی.
افغانستان استارلینک صنعي یۉلداش ترماغی قمراویگه کیرمهیدی. بیراق اَیریم فایدهلنووچیلر قوریلمهلرنی مرکزي آسیا دولتلریده ساتیب آلیب، فعاللشتیرگچ، افغانستانگه آلیب کیرهیاتگنی ایتیلهدی.
بونگچه افغانستانده استارلینک قوریلمهلرینینگ انیقلنیب، مصادره قیلینگنی حقیده خبر بېریلمهگن اېدی.
طالبلر اۉتگن ییلی یوقاری تېزلیکدهگی فایبرنوری انترنتنی اوزیش بۉییچه کۉرسهتمه بېرگن، شوندن سۉنگ ایکّی کون دوامیده مملکت بۉیلب برچه انترنت و تیلفون خدمتلری تۉختهتیلگن اېدی. انترنت اوزیلیشی نینگ سببی حاضرگچه رسماً ایضاحلنمهگن، بیراق مملکتده انترنتگه کیریشنی ینهده چېکلش بارهسیدهگی خواطرلر سهقلنیب قالماقده.
