ایراننینگ کابلدهگی اېلچیخانهسی اۉرینباسری سید حسن مرتضوینینگ ایتیشیچه، طالبلرنینگ امریکاگه قرشی ۲۰ ییللیک اوروشی همده افغانستان مجاهدلری نینگ سابق شوری اتفاقیگه قرشی کورهشی «مقاومت» بۉلگن. اما ایران اسلام جمهوریتی نقطهٔ نظریگه کۉره، طالبلرگه قرشی قوراللی گروهلرنینگ جنگلری «مقاومت» حسابلنمهیدی.
تسنیم خبرگزارلیگی خبریگه کۉره، سید حسن مرتضوی کابلدهگی ییغیلیشده شوندهی دېگن: «حاضرگی مجاهدلرنینگ (طالبان اعضالری نینگ) اَیریملری قیرق ییللیک مقاومت تاریخیگه اېگه.»
اونینگ تأکیدلشیچه، ایران اسلام جمهوریتی طالبلرگه قرشی هېچ قندهی آقیم یاکه گروهنی قۉللب-قوّتلهمهیدی و اولر نینگ جنگینی هم «مقاومت» دېب اتَمهیدی.
سید حسن مرتضوی ینه شوندهی دېدی: «غزهنینگ مقاومتی عزیز، لبناننینگ مقاومتی عزیز، امریکاگه قرشی اوروشیمیز مقاومت دیر. اگر افغانستان عیالی بېوه قالسه، افغانستان بالهسی یېتیم بۉلسه، بو مقاومت می؟»
او، اَیریم طالبلر مخالفلرینینگ تهرانگه باریب، ایران رسميلری بیلن اوچرهشگنیگه تۉختهلیب، بوندهی دېدی:
«بعضی دۉستلر کېلهدی، تکلیف اېتیلهدی و اولر بیلن صحبت قیلینهدی. اما بیزنینگ برچه صحبتلریمیز بیرلیک مسألهسی اطرافیده بۉلهدی.»
سید حسن مرتضوینینگ سۉزلریگه کۉره، افغانستانده بیر نېچه ییلدن بویان «اسلامي حکومت» موجود و ایران طالبلر مخالفلریگه:
«باریب اۉزارا کېلیشینگلر، معمالرینگیزنی اۉزلرینگیز حل قیلینگلر»، – دېب توصیه بېرگن.
او ینه شوندهی دېدی: اگر کیمدیر طالبلر حکومتینی اغدریشگه یاردم بېرسه، بو نینگ «شرعي اساسلری یۉق». اونینگ فکریچه، شوروی اتفاقی، ناتو یاکه امریکا باسقینی دوریدهگی یاردملر چېت اېل باسقینیگه قرشی بۉلگنی اوچون آقلنیشی ممکن اېدی. حاضر اېسه بو مسأله «ایکّی برادر اۉرتهسیدهگی ایچکی ایش» حسابلنهدی.
شو بیلن بیرگه، سید حسن مرتضوی ایران افغانستاندهگی حاضرگی وضعیتنینگ برچه جهتلرینی هم معقولهمسلیگینی ایتدی.
او شوندهی قۉشیمچه قیلدی: «افغانستاندهگی اَیریم معمالر بیزنی هم تشویشگه سالهدی. افغانستان، اونینگ مسلمانلری، شیعهلری و سنیلری ایران اسلام جمهوریتی نینگ بیر بۉلهگیدېک. بیز اَیریم مسألهلردن خواطردهمیز، توصیهلر بېرهمیز، مصلحت قیلهمیز، اما ارهلشمهیمیز.»
ایران طالبلر حاکمیتنی قَیته اېگهلهگنیدن بېری بو گروه بیلن کېنگ سیاسي و اقتصادي علاقهلرنی رواجلنتیریب کېلماقده. شو بیلن بیرگه، اَیریم طالبلر مخالف سیاسي اربابلرینی هم قبول قیلیب کېلگن.
سید حسن مرتضوینینگ بو بیاناتلری طالبانگه قرشی قوراللی جبههلرنینگ، اینیقسه، مملکت شِمالی-شرقیدهگی بدخشان ولایتیده هجوملری کوچهیگن، همده یقینده بیر اولسواللیک ایلک بار قیسقه مدتگه طالبان نظارتیدن چیققن بیر پیتده ینگرهدی.
