پاکستاننینگ بلوچستان ایالتی محلي رسميلری کویتهدهگی کۉمیر کانیده یوز بېرگن پارتلش عاقبتیده کمیده ۳۴کیشی هلاک بۉلگنینی معلوم قیلدی.
رویترز خبر آژانسینینگ بلوچستان ایالتی کانلر وزیری شعیب نوشروانیگه تهیهنیب خبر بېریشیچه، حادثه تیناوون (پنجشنبه، ۸ اسد) کویته شهری یقینیدهگی «سورنج» منطقهسیده صادر بۉلگن.
بلوچستان کانلر وزیرینینگ ایتیشیچه، پارتلش وقتیده کان ایچیده۳۶ نفر ایشچی بۉلگن. اولردن۳۴ نفری هلاک بۉلگنی تصدیقلنگن.
بلوچستان فوق العاده وضعیتلرنی باشقریش ریاستی مسووللریدن محمد فهدنینگ ایتیشیچه، ینه ایکّی نفر کانچی نینگ تقدیرینی انیقلش و اولرنی قیدیریش-قوتقریش ایشلری دوام اېتماقده.
محلي رسميلرگه کۉره، پارتلش کۉمیر کانی نینگ ۱،۲کیلومتردن آرتیق چوقورلیگیده یوز بېرگن.
بلوچستان کانلری بازرسی محمد عاطفنینگ معلوم قیلیشیچه، بیر-بیریگه جوده یقین جایلشگن ایکّی کان تونلی مېتان گازینینگ کوچلی پارتلشی عاقبتیده قولهب توشگن.
پاکستان نینگ بلوچستان ایالتیدهگی، جملهدن کویته شهری یقینیدهگی کۉمیر کانلریده تېز-تېز اۉلیم بیلن یکونلنهدیگن بختسیز حادثهلر صادر بۉلیب تورهدی.
اۉتگن ییلی بوندهی ایکّی فاجعه عاقبتیده ۱۵ کیشی هلاک بۉلگن. جاري ییل نینگ اۉزیده اېسه اوچته علیحده حادثهده کمیده ۵۱کیشی حیاتدن کۉز یومگن.
