امریکا قۉشمه ایالتلری جمهور رییسی دونالد ترامپ و اسرایل باش وزیری بنیامین نتانیاهو آق اویدهگی سۉنگگی اوچرهشوویده ایراننی قوروقلیکدن قمل قیلیش رېجهسینی محاکمه قیلگن.
بریتانیانینگ تلگراف گزېتهسی بوگون (جمعه، ۹ اسد) اۉز منبعلریگه تهیهنیب خبر بېریشیچه، ترامپ و بنیامین نتانیاهو سهشنبه کونی بۉلیب اۉتگن۹۰ دقیقهلیک اوچرهشووده اوشبو مسألهنی محاکمه قیلگن.
اسرایل نینگ یوقاری مرتبهلی عملدارلریدن بیری تلگراف نشریگه شوندهی دېگن: «اگر فقط قوروقلیک یۉللری یاپیلسه-چی؟ تصور قیلینگ، ایران نه بیرار محصولاتنی صادر قیله آلهدی و نه وارد. شونده نیمه بۉلهدی؟ بو ایکّی دولت محاکمه قیلگن احتماللردن بیری دیر.»
بیراق، استعفادهگی جنرال شان مکفارلند(اونینگ قَیسی دولت فقراسی اېکنی کۉرسهتیلمهگن) ایراننی قوروقلیکدن قمل قیلیشنی «دېیرلی امکانسیز» دېب بهالهگن.
اونینگ سۉزلریگه کۉره: «اگر ایران نینگ سودا قیلیش امکانیتینی یۉق قیلسنگیز، اونی اقتصادي جهتدن یکّهلب قۉیهسیز. بو ایراننی تیز چۉکتیریش نینگ بیر اصولی بۉلیشی ممکن. اما ایران قوروقلیک آرقهلی کۉپلب دولتلر بیلن چېگرهداش بۉلگنی سببلی، بوندهی رېجهنی عملده بجریش جوده مرکّب.»
حسابات منبعلری نینگ ایتیشیچه، مذکور رېجه ایران نینگ قۉشنیلری، جملهدن عراق و پاکستانگه باسیم اۉتکزیب، اولرنی چېگرهدهگی اۉتیش پونکتلرینی یاپیشگه مجبور اېتیشنی نظرده توتهدی.
ایران عراق، تورکيه، پاکستان، افغانستان، تورکمنستان، ارمنستان و آذربایجان بیلن قریب آلتی مینگ کیلومتر قوروقلیک چېگرهسیگه اېگه.
شو بیلن بیرگه، تلگراف گزېتهسی عملده بجریلیشی قیین بۉلگن اوشبو رېجه آرتیده «چلغیتووچی تاکیتیک» هم بۉلیشی ممکنلیگینی یازگن.
تخمین قیلینیشیچه، اسرایل و امریکا بو رېجهنی تهراننی کېینگی حقیقي حرکتلریدن چلغیتیش اوچون ایلگری سورگن بۉلیشی ممکن.
امریکا و اسرایل ایراننی قوروقلیکدن قمل قیلیش رېجهسینی محاکمه قیلهیاتگن بیر پیتده، ایران نینگ جَنوبي پورتلری الّهقچان دېنگیز قملی آستیده اېکنی ایتیلماقده.
خبرگه کۉره، امریکا اوردوسی اۉتگن قویاش هجري ییلی نینگ 9-حوت سنهسیده باشلنگن اوروشدن بېری ایکّینچی مرته ایرانگه دېنگیز قملینی جاري اېتگن.
بیرینچی قمل ایکّی آی دوام اېتیب، اسلام آباد کېلیشووی امضالنگنیدن سۉنگ بېکار قیلینگن. اما جنگلر قَیته باشلنگنیدن کېین، امریکا تخمیناً ایکّی هفته اوّل ایران نینگ جَنوبي بندرلرینی ینه قمل آستیده دېب اعلان قیلگنی و تجارت کېمهلری نینگ بو بندرلرگه کیریب-چیقیشینی تۉختهتگنی ایتیلماقده.
