پاکستان اوردوسی جاري میلادي ییلنینگ دستلبکی یېتّی آییده مملکتده ۲۸ته خودکوشلیک هجومی صادر اېتیلگنینی، اولرنینگ اکثریتی افغانستان وطنداشلری تامانیدن عملگه آشیریلگنینی معلوم قیلدی.
پاکستان اوردوسی مطبوعات سۉزلاوچیسی احمد شریف چاودری بوگون (جمعه، ۹ اسد) اۉتکزیلگن مطبوعات انجمنیده هجوملرنی صادر اېتگنلر آرهسیده طالبلر خوفسیزلیک کوچلریگه علاقهدار شخصلر هم بۉلگنینی ایتدی.
او شوندهی دېدی: «جاري ییلده ۲۸ ته خودکوشلیک هجومی صادر بۉلدی. اولرنینگ اکثریتی افغانستان وطنداشلری و طالبلر خوفسیزلیک کوچلریگه علاقهدار شخصلر تامانیدن عملگه آشیریلگن.»
او بو بارهده قۉشیمچه تفصیلات بېرمهدی، بیراق ینه بیر بار طالبلرنی «ترورچیلیک هجوملرینی» قۉللب-قوّتلشده عیبلهدی.
پاکستان اوردوسی سۉزلاوچیسی شونینگدېک، هندستاننی هم پاکستان اوردوسی بیلن تۉغریدن-تۉغری قرهمه-قرشیلیکده موفقیتسیزلیککه اوچرهگنیدن سۉنگ، مملکت حدودیدهگی «ترورچیلیک هجوملرینی» قۉللب-قوّتلهیاتگنلیکده عیبلهدی.
اونینگ سۉزلریگه کۉره، عیناً شو حالت پاکستانده خوفسیزلیک بیلن باغلیق حادثهلر سانینینگ آشیشیگه سبب بۉلگن.
چاودرینینگ ایتیشیچه، ۲۰۲۶-ییل جنورییدن جولای آیی آخریگچه پاکستان قوراللی کوچلری استخبارات معلوماتلریگه اساسلنگن ۴۰ مینگ۳۴۸ ته عملیات اۉتکزگن. شوندن ۳۱مینگدن آرتیغی بلوچستان ایالتلریده عملگه آشیریلگن.
اونینگ قۉشیمچه قیلیشیچه، سۉنگگی یېتّی آی ایچیده پاکستانده جمعی ۳ مینگ ۱۴۵ ته «ترورچیلیک» حادثهسی قید اېتیلگن. شوندن ۱ مینگ ۹۷۱تهسی خیبر پختونخوه، 1 مینگ ۱۴۸ تهسی بلوچستان همده ۲۶تهسی سیند و پنجاب ایالتلریده صادر بۉلگن.
اونینگ معلوماتیگه کۉره، اوشبو دورده پاکستان حکومتیگه قرشی قوراللی گروهلر نینگ۲ مینگ۴۸ نفر اعضاسی، اۉرتهچه کونیگه ۱۰ نفردن، اۉلدیریلگن.
پاکستان اوردوسی مطبوعات سۉزلاوچیسی جاري ییلده قید اېتیلگن «ترورچیلیک حادثهلری» عاقبتیده ۸۱۹ نفر پاکستان فقراسی هلاک بۉلگنینی بیلدیردی. قربانلر آرهسیده ۳۰۳نفر حربي خدمتچی،۱۹۴ نفر پولیس و ۳۲۲ نفر تینچ اهالی وکیلی بار.
بوندن اوّل هم پاکستان حکومتی حربي تاسیساتلرگه اویوشتیریلگن هجوملر اجراچیلرینی افغانستان فقرالری همده طالبلر بیلن علاقهدار شخصلر دېب تأکیدلب کېلگن. طالبلر اېسه پاکستان حکومتیگه قرشی قوراللی گروهلرنی قۉللب-قوّتلهیاتگنی حقیدهگی عیبلاولرنی دایما رد اېتیب کېلهدی.
