«افغانستان آزادلیک جبههسی» اۉز کوچلری بدخشان ولایتینینگ زیباک اولسواللیگیده طالبلرنی قۉللب-قوّتلهیاتگن «خلق ارا ترورچیلر» گروهیگه ضربه بېرگنینی معلوم قیلدی. جبهه بیاناتیگه کۉره، هجوم عاقبتیده ایکّی خارجي جنگری هلاک بۉلگن، ینه اوچ کیشی یرهلنگن.
جبهه ترقهتگن بیاناتده ایتیلیشیچه، اوشبو شخصلر تیناوون (جمعه، ۹-اسد) زیباک اولسواللیگیگه آلیب بارووچی یۉلده نشانگه آلینگن.
بیاناتگه کۉره، اولر محلي تیلنی بیلمهگن و کاروان ترکیبیده زیباکدهگی جنگلرده طالبان صفیده قتنهشیش اوچون یۉل آلگن.
«افغانستان آزادلیک جبههسی» شوندهی دېدی: «طالبلر بیلن بیرگه آزادلیک جبههسی جنگچیلریگه قرشی اوروشده خارجي ترورچی گروهلر نینگ اشتراکی افغانستان طالبلر حکمرانلیگی آستیده همان خلق ارا تروریزم اوچون خوفسیز باشپناه و اونی قَیته تیکلش همده کېنگهیتیریش میدانیگه ایلنگنینی کۉرسهتهدی.»
جبهه هلاک بۉلگن یاکه یرهلنگن جنگریلرنینگ شخصی وطنداشلیگینی آشکار قیلمهگن.
طالبلرنینگ بدخشاندهگی محلي رسميلری حاضرچه اوشبو دعوا یوزهسیدن ایضاح بېرمهگن.
«افغانستان آزادلیک جبههسی» قریب اۉن کون اوّل زیباک اولسواللیگیده طالبلرگه قرشی هجوملرنی باشلهگنینی و اولسواللیک نینگ اَیریم حدودلرینی نظارتیگه آلگنینی دعوا قیلماقده.
جبهه هجوملر باشلنگنیدن بیر کون اۉتیب، ۲۱نفر طالبان اعضاسی اۉلدیریلگنی و ینه ۳۵ نفری یرهلنگنی حقیده هم بیانات بېرگن اېدی.
طالبلر اېسه زیباک اولسواللیگیدهگی دستلبکی تۉقنهشوولرنی تصدیقلهگن، بیراق واقعهنی باشقهچه تلقین قیلگن.
طالبلر نینگ «۲۱۹-عمر ثالث» فرقهسی معلوماتیگه کۉره، جنگ زیباک اولسواللیگی نینگ تۉپخانه حدودیده صادر بۉلگن. اونده پاکستان نینگ چترال تومنیدهگی شاه سلیم حدودیدن کیریب کېلگن بېش نفر «عصیانچی» اۉلدیریلگن، قالگنلری اېسه ینه چترالگه چېکینگن.
حاضرچه طالبلر زیباک اولسواللیگیده «افغانستان آزادلیک جبههسی» بیلن جنگلر دوام اېتهیاتگنینی تصدیقلهمهگن.
