طالبلر نظارتی آستیدهگی افغانستان ملي فوتبال فدراسیونی مملکت ملي فوتبال تېرمه جماعهسیگه باش مربي اېتیب تعیینلش اوچون ینگی مربي ایزلهیاتگنینی معلوم قیلدی.
فدراسیون چهارشنبه کونی کېچقورون، ۱۱-سنبله کونی ایکس اجتماعي ترماغیده نشر قیلگن پُستیده بو حقده معلومات بېرگن. بیراق تېرمه جماعهنینگ سابق باش مربسی «خوزه آنتونیو نوگیرا»، نینگ کېینگی تقدیری حقیده هېچ قندهی معلومات بېرمهگن.
برازیللیک «خوزه آنتونیو نوگیرا»، جاري ییل نینگ فبروری آییده بیر ییللیک شرطنامه اساسیده افغانستان ملي فوتبال تېرمه جماعهسیگه باش مربي اېتیب تعیینلنگن اېدی.
او ایتالیالیک وینچنزو آلبرتو ازنینگ اۉرنینی اېگهلهگن. آلبرتو ۲۰۲۵-ییل می آییده افغانستان ملي تېرمه جماعهسینی باشقهره باشلهگن اېدی.
ایتالیالیک مربي اېسه اۉز نوبتیده اۉزبېکستانلیک عثمان توشف نینگ اۉرنینی اېگهلهگن. توشف نتیجهلر نینگ یامانلیگی سبب قیسقه مدتدن سۉنگ افغانستان تېرمه جماعهسی باش مربيلیگیدن استعفا بېرگن.
عثمان توشف دن اوّل اېسه اېشلی وېستوود افغانستان تېرمه جماعهسینی باشقرگن. او ۲۰۲۴-ییل اگوست آییده قیسقه مدت فعالیت یوریتگنیدن سۉنگ، آلدیندن آگاهلنتیرمسدن افغانستان تېرمه جماعهسینی ترک اېتیب، گانکانگ ملي تېرمه جماعهسی باش مربيلیگینی قبول قیلگن.
افغانستان ملي فوتبال تېرمه جماعهسی سۉنگگی ییللرده رسمي و اۉرتاقلیک اوچرهشوولریده یخشی نتیجهلر کۉرسهته آلمهدی و کۉپلب مغلوبیتلرگه اوچرهدی. مربيلر نینگ تېز-تېز المشتیریلیشی بونگه سبب بۉلهیاتگن عامللردن بیری صفتیده کۉریلماقده.
افغانستان فوتبال فدراسیونسی هم کېنگ کۉلملی تنقیدلرگه اوچرهب کېلماقده. اوّلراق اَیریم فوتبالچیلر فدراسیوننی «سودا و فساد»ده عیبلب، اېندی «فساد باتقاغیگه ایلنگن بو جای» بیلن همکارلیک قیلیشنی و ملي تېرمه جماعهده اۉیناشنی ایستهمسلیکلرینی بیلدیرگن اېدی.
