طالبلر رهبری هبتالله آخوندزاده بوندن بویان عمومی قتناو یۉللریده صادر بۉلهدیگن ترافیک حادثهلری سببچیلرینی انیقلش، حبسگه آلیش و محکمه قیلیش حقیده فرمان بېردی.
طالبلر رهبرینینگ ینگی فرمانی چهارشنبه کونی (۱۱-سنبله) اوشبو گروهنینگ اداری ایشلر ادارهسی تامانیدن اعلان قیلینگن. اونده عمومی قتناوو یۉللریدهگی ترافیک حادثهلریده هلاک بۉلگنلرنینگ میراثخۉرلری حقوقلری تأمینلنیشی بېلگیلنگن.
فرمانده ایچکی ایشلر وزیرلیگیگه قتناوو یۉللریده صادر بۉلگن ترافیک حادثهلری سببچیلرینی حبسگه آلیش و هر قندهی حالتده هم تېگیشلی محکمهگه تاپشیریش تاپشیریلگن.
طالبلر رهبری ترانسپورت و هوانوردلیک وزیرلیگیگه ترافیک حادثهلری سببچیلرینی انیقلش و حبسگه آلیش اوچون ضرور معلوماتلر همده حجتلرنی توپلشده ایچکی ایشلر وزیرلیگی بیلن همکارلیک قیلیشنی بویورگن.
فرمانده تېگیشلی محکمهلرگه قتناوو یۉللریدهگی ترافیک حادثهلری بیلن باغلیق ایشلرنی «اوستوار» ترتیبده کۉریب چیقیش همده «اوشبو حادثهلرده هلاک بۉلگن وایهگه یېتمهگن و یۉق میراثخۉرلرنینگ برچه حقوقلرینی مسوول شخص یاکه شخصلردن اوندیریب، قانوني اېگهلریگه تاپشیریش» تاپشیریلگن.
افغانستان قتناوو یۉللریده، اینیقسه کابلدن هرات، بلخ و ننگرهار ولایتلری تامان آلیب بارووچی اوچته اساسي یول وقتی-وقتی بیلن آغیر ترافیک حادثهلری صادر بۉلهدی. اکثریت حاللرده یۉلاوچی اتوبسلری اشتراکیدهگی حادثهلرنینگ اساسي سببی صفتیده تېزلیکنی آشیریش و هیداوچیلرنینگ احتیاطسیزلیگی کۉرسهتیلهدی.
طالبلر اۉتگن ییلی یۉلاوچی اتوبسلری تېزلیگینی نظارت قیلیش اوچون جی پی اس تیزیمی اۉرنهتیلیشینی معلوم قیلگن اېدی. بیراق شوندن کېین هم بیر نېچه بار آدملر اۉلیمیگه سبب بۉلگن ترافیک حادثهلری صادر بۉلدی.
آلدین بو کبی حادثهلر بۉییچه ایشلر کۉریب چیقیلمهگن. حاضرگچه قتناوو یۉللریدهگی ترافیک حادثهلری سببچیلریدن هېچ بیری حبسگه آلینمهگن یاکه محکمه قیلینمهگن.
