نیویورکتایمز نشری امریکالیک رسميلرگه تهیهنیب یازیشیچه، ایران امریکا بیلن آلتی آی دوام اېتگن اوروشدن سۉنگ اۉزینینگ حربي امکانیتی، باسیم اۉتکزیش واسطهلری و قرشیلیک کۉرسهتیش امکانیتلریگه نسبتاً ایشانچی ینه-ده آشگن.
نشر نینگ جمعه کونی (۱۳-سنبله) اعلان قیلینگن خبریده ایتیلیشیچه، بو بها اقش نینگ ینگی رزوېدکه حساباتلری اساسیده تیارلنگن.
نیویورکتایمزنینگ یازیشیچه، تهران حاضرده اۉزینینگ حربي امکانیتلری و امریکا قدرتینینگ چېکلاولرینی یخشیراق انگلب یېتگن.
امریکالیک رسميلرنینگ ایتیشیچه، ایران اوروشنی اوزاقراق دوام اېتتیریشگه تیار بۉلیشی ممکن، چونکه بو واشنگتن اوچون خرجتلرنی آشیرهدی.
امریکا نمایندهلر اعضاسینینگ استخبارات کمیتهسی اعضاسی جیسون کرونینگ ایتیشیچه، ایران اوروش باشلنگنیدن آلتی آی اۉتیب، آغیر ضربهلرگه قرهمهی، اۉز موقعیگه نسبتاً کتّه ایشانچگه اېگه.
او شوندهی دېگن: «ایرانلیکلر اۉز موقعلریگه نسبتاً جوده کتّه ایشانچده. اولر سېزیلرلی ضرر کۉریشدی، اما بو هر دایم اولرنینگ حساب-کتابلریده انابتگه آلینگن. اولر ضرر کۉریشلری ممکنلیگینی بیلیشهدی و بو یېرده انچه اوزاق دوام اېتهدیگن اۉییننی کۉزلشماقده.»
اونینگ ایتیشیچه، ایران رهبریتی حاضر ینه-ده جیپسلشگن، ایچکی مخالفلر هم باستیریلگن و مملکت هنوز اۉز ذخیرهلریده راکتلر همده درانلرگه اېگه.
جیسون کرو ایراننینگ اۉزیگه بۉلگن ایشانچی آشیشینینگ سببلریدن بیری صفتیده هرمز بۉغازینی «باسیم واسطهسی» صفتیده سهقلب قالگنینی کۉرسهتگن.
او شوندهی دېیدی: «اولر هر دایم بۉغاز مهم سودالشوو واسطهسی اېکنینی بیلیشگن، اما حاضر اۉز قۉللریدهگی بو واسطه اولرگه بېرهیاتگن تأثیرنینگ اهمیتینی اوّلگیدن هم یخشیراق انگلب یېتیشدی.»
اوروشدن آلدین هرمز بۉغازی آرقهلی دنیا نفتینینگ قریب بېشدن بیر قِسمی تشیلگن. ایران اوروش دوامیده بۉغازنی یاپگن و امریکا تهران اېندی اوشبو سوو یۉلینی بېقرارلشتیریش امکانیتیگه اېگه اېمسلیگینی بیلدیرگنیگه قرهمهی، سۉنگگی کونلرده هم کېمهلرگه هجوملر اویوشتیریلگن.
اقش وکیللر اعضاسی نینگ استخبارات کمیتهسی اعضاسی جاش گاتهایمرنینگ ایتیشیچه: «ایرانلیکلر اۉز قۉللریده ماکسیمال باسیم واسطهسی بار، دېب اۉیلشماقده. شوندهی اېکن، اولرنینگ نقطهٔ نظریدن قرهگنده، نېگه اولر جمهور رییسگه [امریکا جمهور رییسیگه] باسیمنی دوام اېتتیرمسلیکلری کېرهک؟»
گاتهایمر ایران حکومتی نینگ امریکا بیلن تۉقنهشوونی دوام اېتتیریش بارهسیدهگی حاضرگی ایشانچی حقیده گپیرر اېکن، ضررگه برداش بېریش قابلیبی تهران ایشانچینینگ آشیشیگه سبب بۉلگنینی تأکیدلهگن.
او شوندهی دیگن: «ایران حکومتی اۉز خلقینینگ عذاب-عقوبتلریگه اونچهلیک اهمیت بېرمهگنی اوچون هم آغیر اقتصادي چېکلاولرنی، هم حربي بامباردمانلرنی باشدن کېچیره آلدی.»
سایبری ساحهده هم اېران نینگ ددیللیگی آشگنینی کۉرسهتووچی بېلگیلر کوزهتیلماقده. امریکالیک رسميلر نینگ ایتیشیچه، اېران بیلن باغلیق هکرلر اقشدهگی ۱۰۰دن آرتیق سوو تأمیناتی تیزیملریگه هجوم قیلگن بۉلیشی ممکن.
امریکا حکومتینینگ سابق سایبری خوفسیزلیک متخصصی الکس اورلئان نینگ ایتیشیچه، حتا «ثمرهسی پست سایبری هوجوملر» هم «اوروشنی ایچکی قۉللب-قوّتلشنی سوسهیتیریش» اوچون ایشلهتیلیشی ممکن.
او شوندهی دېگن: «بوندهی هجوملر امریکا جماعتچیلیگینی سېزیلرلی درجهده خواطرگه ساله آلمهسه هم، بری بیر حکومتنینگ ماجرانی باشقریش اصولیدن ایچکی ناراضیلیک و صبر-طاقت نینگ کمهییشیگه قرهتیلگن کېنگراق سعی-حرکتلرنینگ بیر قِسمی بۉلیشی ممکن.»
امریکا جمهور رئیس اۉرین باسریی جې دی وېنس هم ایراننینگ امریکالیکلرنینگ کوندهلیک حیاتینی ایزدن چیقریش امکانیتینی بالواسطه تن آلگن، بیراق اونینگ فکریچه، بو امکانیت «جوده چېکلنگن».
نیویورکتایمز خبریگه کۉره، ونس شوندهی دېگن: «اگر ایران نینگ امریکالیکلرنینگ عادتي حیاتینی ایزدن چیقریش قابلیبیگه قرهسنگیز، مېنیمچه، بو امکانیت جوده چېکلنگن. صفر اېمس، اما جوده چېکلنگن. مېن باشقه تامانلردن کېلیشی ممکن بۉلگن کیبېرهوجوملردن کۉپراق خواطردهمن.»
امریکالیک رسميلر اېراننینگ اۉزیگه بۉلگن ایشانچی حقیده گپیرهیاتگن بیر پیتده، امریکا جمهور رییسی دونالد ترامپ بونینگ مطلقا عکسینی تأکیدلهماقده.
او بیر نېچه بار ایران مغلوب بۉلگن دولتگه ایلنگنینی ایتگن. ترامپ عامهوي اخبارات واسطهلریگه بېرگن بیاناتلری و نطقلریده ایراننینگ حربي صلاحیتی یۉق قیلینگنی، مملکت اقتصادیاتی قولهگنی، سیاسي جهتدن یکّهلنیب قالگنی و هرمز بۉغازی اوستیدن نظارت هم امریکا کوچلری قۉلیگه اۉتگنینی تأکیدلب کېلگن.
