طالبلرنینگ تشقی ایشلر وزیری امیرخان متقي بیرلشگن ملتلر تشکیلاتی باش کاتبینینگ سیاسي و تینچلیک مسألهلری بۉییچه اۉرینباسری رز ماری دیکارلو بیلن تېلفون آرقهلی صحبتلشدی.
طالبلر تشقی ایشلر وزیرلیگی بوگون، یکشنبه، ۱۵-سنبله کونی اعلان قیلگن بیاناتیده ایتیلیشیچه، تېلفون صحبتی چاغیده بیرلشگن ملتلر تشکیلاتی و طالبلر اۉرتهسیدهگی همکارلیکنینگ عمومي حالتی همده کېلهجکده همکارلیکنی کوچهیتیریش و کېنگهیتیریش یۉللری محاکمه قیلینگن.
وزیرلیکنینگ قۉشیمچه قیلیشیچه، ایکّی تامان دوحههدهگی جریان دایرهسیده کېلهجکدهگی اۉزارا همکارلیک و ملاقات بارهسیدهگی قرهشلرینی هم اۉرتاقلشگن.
رز ماری دیکارلو ۱۴۰۳-هجري شمسي ییلده اۉتکزیلگن افغانستان بۉییچه دوحهدهگی جریاننینگ اوچینچی ییغیلیشیگه رهبرلیک قیلگن. اوشبو ییغیلیشده طالبلر وکیللری اشتراک اېتگن، بیراق افغانستانلیک عیاللر و مدنی جماعهچیلیک وکیللری قتنهشمهگن.
اوچرهشوو یکونیدن سۉنگ رز ماری دیکارلو طالبلر بیلن مذاکرهلر «آچیق» و «فایدهلی» بۉلگنینی ایتگن. شونینگدېک، او «افغانلر بیر چوکی اطرافیده جمعلنیشگه تیار اېمس»، دېب بیلدیرگن.
بیرلشگن ملتلر تشکیلاتی باش کاتبینینگ سیاسي و تینچلیک مسألهلری بۉییچه اۉرینباسری جاري ییل نینگ جوزا آییده هم کابلگه تشریف بویوریب، طالبلر رسميلری بیلن دوحهدهگی جریان، گیاهوند مادّهلرگه قرشی کورهش و انسانپرورلیک یاردم مسألهلرینی محاکمه قیلگن.
