طالبلر عالي تحصیلات وزیرلیگی کابل پولیتخنیک بیلیم یورتیده کارشناسلیک باسقیچیده تۉرتته دیپارتمنتگه اېگه هوافضا مهندسلیک فاکولتهسی تشکیل اېتیلیشینی معلوم قیلدی.
اوشبو وزیرلیک یکشنبه کونی (۱۵سنبله) بیانات نشر قیلیب، مملکتدهگی دولت و خصوصي بیلیم یورتلرده کارشناسلیک، ماسترلیک، دوکتورا همده طبیات متخصصلیگی بۉییچه ینگی یۉنهلیش و فاکولتهلر تشکیل اېتیلیشینی معلوم قیلدی.
بیاناتگه کۉره، طالبلر عالي تحصیلات کېنگشی دولت و خصوصي بیلیم یورتلرده ۲۸ ته ینگی فاکولته و ۲۹ ته ینگی تعلیم یۉنهلیشینی تشکیل اېتیشنی معقولهگن.
ینگی یۉنهلیشلر قطاریده کابل پولیتخنیک بیلیم یورتیده هوافضا مهندسلیک فاکولتهسینی تشکیل اېتیش هم بار.
اوشبو فاکولته اوچون تۉرتته دیپارتمنت – اوچووچیسیز اوچاقلر و اوچووچیسیز تیزیملر مهندسلیگی، اوچاقسازلیک مهندسلیگی، هوفضا مهندسلیک همده رادار و ایونیک مهندسلیگی تشکیل اېتیلیشی رېجهلشتیریلگن.
شونینگدېک، طالبلر دولت و خصوصي بیلیم یورتلرده بېشته دوکتورا دستورینی تشکیل اېتیشنی هم معقولهگن.
کابل تعلیم و تربیه بیلیم یورتیده «قرآن و قرآن بیلیملری» همده «تعلیم باشقرووی» بۉییچه دوکتورا دستورلری، کابل بیلیم یورتینینگ حقوق و سیاستشناشلیک فاکولتهسیده «خلقارا حقوق» و «خلقارا مناسبتلر» بۉییچه دوکتورا دستورلری، خصوصي کاردان بیلیم یورتیده اېسه «بیزنس باشقرووی» بۉییچه دوکتورا دستوری تشکیل اېتیلیشی رېجهلشتیریلگن.
شونینگدېک، «کابل طبیات بیلیم یورتیده»ده یورهک کسللیکلری، انستیزی و جدی مراقبتلر یۉنهلیشلری بۉییچه اوچته «اۉته اختصاصلشگن» طبي دستور تشکیل اېتیلیشی کۉزده توتیلگن.
بیراق طالبلر ینگی تعلیم دستورلرینی، جملهدن، افغانستانده مثلی کۉریلمهگن هوا فضا یۉنهلیشنی عملگه آشیریش امکانیتی و صلاحیتی حقیده هېچ قندهی ایضاح بېرمهگن.
