بیرلشگن ملتلر تشکیلاتی انسان حقوقلری کېنگشی نینگ ۶۳ ییغینی بوگون (دوشنبه، ۱۶-سنبله) سوئیسنینگ جنیوا شهریده باشلندی.
افغانستاننینگ جنیوادهگی نمایندهسی نصیر احمد اندیشهنینگ معلوم قیلیشیچه، سودان و میانمار بیلن بیر قطارده افغانستاندهگی وضعیت هم اوشبو کېنگشده محاکمه قیلینهدیگن مهم موضوعلردن بیری بۉلهدی.
اونینگ ایتیشیچه، بیرلشگن ملتلر تشکیلاتینینگ افغانستان انسان حقوقلری بۉییچه مخصوص گزارشگری ریچارد بنت هم بوگون افغانستاندهگی انسان حقوقلری حالتی یوزهسیدن آلتی آیلیک حساباتینی کېنگشگه تقدیم اېتهدی.
اندیشهنینگ سۉزلریگه کۉره، بنتنینگ گزارشی افغانستاندهگی بالهلر و اۉسمیرلرنینگ حالتیگه علیحده اعتبار قرهتگن حالده تیارلنگن.
نصیر احمد اندیشه افغانستاننینگ جنیوادهگی نمایندهلیگی همده انسان حقوقلری حمایهچیلری بیرلشگن ملتلر تشکیلاتی انسان حقوقلری کېنگشی ییغیلیشیده افغانستاندهگی وضعیت حقیده سۉز یوریتیشینی ایتدی.
اونینگ قۉشیمچه قیلیشیچه، اوشبو ییغین دایرهسیده افغانستان نمایندهلیگی و انسان حقوقلری تشکیلاتلری هم افغانستاندهگی وضعیتگه بغیشلنگن اوچرهشوولر اۉتکزهدی.
بیرلشگن ملتلر تشکیلاتی انسان حقوقلری کېنگشینینگ ییغینی بوگون باشلندی و بیر آی دوام اېتهدی.
کېنگشنینگ اوّلگی ییغینلریده هم افغانستاندهگی انسان حقوقلری حالتی اساسي محاکمه موضوعلریدن بیری بۉلگن. انسان حقوقلری تشکیلاتلری طالباننی انسان حقوقلرینی بوزگنلیک اوچون جوابگرلیککه تارتیش بۉییچه دولتلردن عملي چارهلر کۉریشنی طلب قیلیب کېلماقده.
