طالبلر اعضالری هراتده بیر یاش ییگیتنی عامه آلدیده آتیب اۉلدیرگن. منبعلرگه کۉره، طالبلرنینگ پشتون زرغوون اولسواللیگیدهگی امنیه قوماندانی، اونینگ اوکهسی و قهیین اوکهسی بو ییگیتنی قییناققه سالیش و شفقتسیزلرچه اۉلدیریشده اشتراک اېتگن. طالبلر ییگیت نینگ آتیب اۉلدیریلیشینی شخصي قصاص نتیجهسی دېب اتهگن.
بیر منبع «اطلاعات روز» گزیتهسیگه بېرگن صحبتیده قرباننینگ اسمی عبدالقدیر پهلوانزاده بۉلگنینی ایتدی. او هرات ولایتینینگ پشتون زرغون اولسواللیگیدهگی «تونيان» قیشلاغیده توغیلگن. منبعگه کۉره، ۳۱ یاشلی عبدالقدیر ایکّی فرزندنینگ آتهسی بۉلگن و هرات شهریده پیوندچیلیک بیلن شغللنگن.
منبعنینگ ایتیشیچه، عبدالقدیر جمعه کونی (۱۳-سنبله) ساعت ۵:۰۰لر اطرافیده هرات شهرینینگ ۵-حوزهسیدهگی «پسته نمبر یک» یانیلغی قوییش شاهابچهسیده آتیب اۉلدیریلگن. عبدالقدیر موترسیکل اوچون یانیلغی و سویولتیریلگن گاز آلیش مقصدیده شاهابچهگه بارگن.
یانیلغی شاهابچهسینینگ کوزهتوو کامرهسی تامانیدن یازیب آلینگن ویدیوده قوراللنگن شخصلر دستلب بیر کیشینی کلتکلهیاتگنی، کېین اېسه اونینگ قۉللرینی باغلهیاتگنی کۉرینهدی.
منبع اوشبو ویدیونی ایضاحلر اېکن، عبدالقدیرنی کلتکلهگن شخصلر طالبلرنینگ پشتون زرغون اولسواللیگیدهگی امنیه قوماندانی سید احمد محمديگه علاقهدار شخصلر اېکنینی ایتدی.
عبدالقدیر یېرده یاتگن پیتده قوراللنگن شخصلردن بیری چۉنتهگیدن تۉپّانچهسینی چیقریب، اونگه قرهته اۉق اوزهدی.
باشقه بیر نېچه قوراللنگن شخصلر آتیشمهنینگ آلدینی آلیشگه اورینگنیگه قرهمهی، قوراللی شخص ینه عبدالقادیرگه قرهته بیر نېچه مرته اۉق اوزهدی.
منبعنینگ ایتیشیچه، اۉق اوزگن شخص طالبلرنینگ پشتون زرغون تومنیدهگی خوفسیزلیک قوماندانی سید احمد محمدينینگ قهیین اوکهسی بۉلگن. منبع اونینگ اسمینی حامد دېب ایتیب، او فراه ولایتیده توغیلگنینی بیلدیرگن.
منبعگه کۉره، طالبلرنینگ پشتون-زرغون تومنیدهگی امنیه قوماندانی بوندن ایکّی هفته آلدین حامدنینگ۱۴ یاشلی سینگلیسینی نکاحیگه آلگن.
«اگر او عیبدار بۉلگن بۉلسه، نېگه بوندهی وحشيلرچه اۉلدیریلدی؟»
عبدالقدیرنینگ آتیب اۉلدیریلگن جاییده تصویرگه آلینگن ویدېوده اونینگ جان بېرهیاتگن پیتی، طالبلر اعضالری و واقعه جاییدهگی آدملر اېسه بو حالتنی کوزهتهیاتگنی عکس اېتگن.
عبدالقدیر عایلهسیگه یقین منبع اونینگ اۉلدیریلیشیگه سبب بۉلگن حالتلر انیق اېمسلیگینی ایتدی.
منبعگه کۉره، عبدالقدیرنینگ آنهسی و خاتینی اونینگ حبسگه آلیش تۉغریسیده هېچ قندهی بویروغی بۉلمهگنینی، کمیده سۉنگگی بیر ییل ایچیده هېچ کیم بیلن جنجللشمهگن یاکه جسماني مشتلشووگه کیریشمهگنینی ایتگن. منبع نینگ سۉزلریگه کۉره، عبدالقدیرنینگ دشمنلری هم بۉلمهگن.
منبع عبدالقدیرنینگ عایلهسی: «اگر فرزندیمیز عیبدار بۉلگن بۉلسه، نېگه او بوندهی وحشيلرچه اۉلدیریلدی؟»، دېب سۉرهیاتگنینی ایتدی.
«هېچ کیم جوابگر اېمس»
منبعنینگ ایتیشیچه، عبدالقدیر آتیب اۉلدیریلگنیدن سۉنگ طالبلرنینگ پشتون-زرغون تومنیدهگی امنیه قوماندانی اۉز آدملری بیلن هرات شهریدن قاچیشگه اورینگن، بیراق انجیل تومنیدهگی طالبلر پولیسینینگ اۉق اوزیشی آرتیدن توختهتیلگن.
منبعگه کۉره، طالبلر پولیسی بیلن اوشبو گروهنینگ پشتون-زرغون تومنیدهگی خوفسیزلیک قوماندانی آدملری اۉرتهسیده قوراللی تۉقنهشوو یوز بېرگن.
منبع امنیه قوماندانی اۉز شخصینی تصدیقلاوچی حجتینی کۉرسهتیب، آزاد قیلینگنینی، اونینگ آدملری اېسه بیر مدت حبسده سقلنیب، کېینچهلیک اولر هم آزاد قیلینگنینی ایتدی.
منبعنینگ قۉشیمچه قیلیشیچه، شنبه کونی هرات حاکمی حضوریگه قریب ۱۰۰نفر آقسقال و قبیله نفوذلی وکیللری بارگن، بیراق اولرگه طالبلر حاکمی بیلن گپلشیشگه رخصت بېریلمهگن.
منبعگه کۉره، هراتدهگی طالبلر حاکمی دفترینینگ رهبری آتیشمه صادر اېتگن شخصنینگ تاغهسی حسابلنهدی. منبع: «او حاکم نینگ کۉزی و قولاغینی باغلب قۉیگن و حاکم نینگ ارهلشیشیگه یۉل قۉیمهیپتی»، دېگن.
طالبلر: آتیشمه سببی قصاص بۉلگن
منبعنینگ ایتیشیچه، طالبلر خادملری کېچه تونده یانیلغی شاهابچهسی و «پسته نمبر یک» اطرافیدهگی دوکانلرگه باریب، کوزهتوو کامرهسی ویدېوسینی ترقهتگنی اوچون اولرنینگ اېگهلرینی حبسگه آلگن.
منبعنینگ ایتیشیچه، عبدالقدیرنینگ عایلهسی عدالت طلب قیلماقده، بیراق حاضرگچه اولرنینگ آوازی هېچ قهیېرگه یېتیب بارمهگن.
هراتدهگی محلي طالبلر رسميلری عبدالقدیر پهلوانزادهنینگ اۉلدیریلیشی سببینی شخصي عداوت بیلن باغلگن.
هرات طالبان حاکمی نینگ مطبوعات سوزلاوچیسی محمد یوسف سعیدينینگ ایتیشیچه، پهلوانزاده بیر ییل آلدین فضل احمد اسملی شخصنی اۉلدیرگن. اونینگ اۉغلی اېسه جمعه کونی آتهسی نینگ اۉلیمی اوچون قصاص آلیش مقصدیده پهلوانزادنی نشانگه آلیب، اۉلدیرگن.
اونینگ ایتیشیچه، گماندار و اونینگ شریکلری حبسگه آلینگن، اولردن تېرگاو آلیب باریلماقده و اولرنینگ ایشی سودلرگه یوباریلگن.
عبدالقدیر عایلهسیگه یقین منبع طالبلر قاتللیکنی آقلش و اونی عادتي حالگه ایلنتیریشگه اورینهیاتگنینی، عدالت اۉرنهتیش نیتیده اېمسلیگینی ایتدی.
منبع نینگ سۉزلریگه کۉره، اگر عبدالقدیر قاتللیکده عیبلنگن بۉلسه، نېگه اونگه قرشی عریضه و حبسگه آلیش تۉغریسیده جلب چیقریلمهگن؟
طالبلر بوندن آلدین هم بیر نېچه بار آدملرنی اۉزباشیمچهلیک بیلن آتیب اۉلدیرگن. بو گروه یقینده کابلده تورلی حالتلرده اۉغریلیکده عیبلنگن کمیده۱۰ کیشینی هم آتیب اۉلدیرگن.
