طالبلر باش وزیرینینگ اقتصادي مسألهلر بۉییچه اۉرینباسری عبدالغنی برادر بوگون (دوشنبه، ۱۶-سنبله) امریکانینگ افغانستان بۉییچه سابق مخصوص وکیلی زلمی خلیلزاد بیلن اوچرهشیب، ملاقات اۉتکزدی.
طالبلر باش وزیری نینگ اقتصادي مسألهلر بۉییچه اۉرینباسری ادارهسینینگ معلوم قیلیشیچه، اوچرهشووده تامانلر «منطقهدهگی وضعیت، افغانستانده یخشی باشقروو و آستقورمه ساحهلریده عملگه آشیریلگن ایشلر همده خارجي کمپنیلرنینگ افغانستاننینگ تورلی ساحهلریگه سرمایه کیریتیشی اوچون موجود امکانیتلر» حقیده فکر المشگن.
اوشبو اداره خلیلزادگه تهیهنیب یازیشیچه، افغانستانده خارجي سرمایهلرنی جلب قیلیش اوچون یخشی شرایط یرهتیلگن. سعوديه عربستانی، قطر، آذربایجان و ناروې کمپنیلری افغانستاننینگ تورلی ساحهلریگه، خصوصاً، نفت و گازنی قیدیریش همده قزیب آلیشگه سرمایه کیریتیشگه قیزیقیش بیلدیرماقده.
عبدالغنی برادرنینگ ایتیشیچه، طالبلر اوشبو مملکتلرنینگ افغانستانگه سرمایه کیریتیشینی آلقیشلهیدی و اولر بیلن همکارلیک قیلهدی.
زلمی خلیلزاد حاضرچه طالبلر باش وزیرینینگ اقتصادي مسألهلر بۉییچه اۉرینباسری بیلن اوچرهشووی یوزهسیدن ایضاح بېرمهگن.
زلمی خلیلزاد افغانستانگه سۉنگگی تشریفی دوامیده طالبلر تشقی ایشلر وزیری امیرخان متقي بیلن هم اوچرهشیب، طالبلر و امریکا اۉرتهسیدهگی مناسبتلرنی رواجلنتیریش مسألهسینی محاکمه قیلگن.
او طالبلر افغانستانده حاکمیتنی قَیته قۉلگه کیریتگنیدن بویان بیر نېچه بار کابلگه تشریف بویوریب، اوشبو گروه نمایندهلری بیلن امریکا بیلن مناسبتلر و افغانستانگه خارجي سرمایهلرنی جلب قیلیش مسألهلرینی محاکمه قیلگن.
