افغانستان سابق جمهور رئیس اۉرینباسریی و «افغانستان اسلامي ملي جنیش» حزبی رهبری، عبدالرشید دوستم خاتم النبیین علمی حوزه نینگ بۉشهتیلیشی همده اوشبو مرکز استادلری و اۉقووچیلرینینگ حبسگه آلینیشی کمسیتیش و زۉراورلیک اېکنینی ایتدی.
دوستم بوگون (سهشنبه، ۱۷-سنبله) بیاناتیده طالبلردن «زودلیک بیلن بو حرکتیدن واز کېچیش و محبوسلرنی آزاد قیلیش»نی سۉرهگن.
او: «طالبان زۉراورلیک و نمایشچیلرگه باسیم اۉتکزیش آرقهلی خاتم النبیین مدرسهسینینگ بیر قطار استادلری و اۉقووچیلرینی حبسگه آلیب، قماققه تشلهدی. شونینگدېک، حرمتسیزلیک، کمسیتووچی مناسبت و زۉراورلیک بیلن اوشبو مرکزنی بۉشهتدی»، دېگن.
اونینگ قۉشیمچه قیلیشیچه، طالبلر نهفقط هزارهلرگه، بلکه باشقه خلقلرگه، جملهدن تورکي خلقلر- اۉزبېک و تورکمنلر همده تاجیکلرگه قرشی هم زۉراورلیک، عدالتسیزلیک و حقوقلرنی پایمال قیلیشگه قۉل اورماقده.
عبدالرشید دوستم نینگ ایتیشیچه، طالبلر هر کونی مملکتنینگ تورلی حدودلریده تورلی بهانهلر بیلن هزاره، اۉزبېک و تاجیکلرنینگ یېر و اویلرینی تارتیب آلماقده، اولرنی کلتکلش و حقارت قیلیش بیلن انساني همده حقوقي معیارلرگه ضد حرکتلر، حتا آدملرنی آتیب اۉلدیریشگه قۉل اورماقده.
اونینگ قۉشیمچه قیلیشیچه، طالبلرنینگ بوندهی مناسبتی خلق آرهسیده «قۉرقوو و بېقرارلیک»نی یوزهگه کېلتیریب، آوازلرنی بۉغیش آرقهلی آدملرنی امیدسیزلیککه توشیرماقده.
دوستم آگاهلنتیریب، «هېچ بیر حکومت ظلم، دیکتاتورلیک و عدالتسیزلیک بیلن اوزاق یشهی آلمهیدی. طالبلر هم بو حالت اۉتکینچی اېکنینی توشونیشی کېرهک و خلقنینگ غضبیدن قوتولیش همده قاچیش یۉلی اولر اوچون هم قالمهیدی»، دېگن.
طالبلر کېچه خاتم النبیین علمی حوزهسینی بۉشتگن. اوشبو گروه عدلیه وزیرلیگی مرکز دولت یېریده قوریلگنینی اَیتماقده. بیراق مذکور مرکز اساسچیسی آیتالله محمد آصف محسنینینگ فرزندلری طالبلر مرکزنی «سیاسي مقصدلرده و محکمهنینگ رسمي قراریسیز» بۉشهتگنینی بیلدیرماقده.
