کابلدهگی منبعلر طالباذ کوچلری «افغانستان عالي شیعهلر کمیسیونی» دفترینی قورشهب آلگنینی معلوم قیلدی.
منبعلردن بیرینینگ ایتیشیچه، اوشبو دفتر کابلنینگ کارته چهار منطقهسیده جایلشگن.
منبعگه کۉره، طالبلر تخمیناً ساعت ۲:۰۰ده «افغانستان عالي شیعهلر کمیسیونی» دفترینی قورشهب آلگن.
«افغانستان عالي شیعهلر کمیسیونی» طالبلر بیلن موافقلشتیریلگن حالده تشکیل اېتیلگن و اونینگ اوشبو گروه استخباراتی کمهگیده فعالیت یوریتهیاتگنی دعوا قیلینهدی.
کمیسیون دفترینینگ نیمه سببدن قورشهب آلینگنی حاضرچه نامعلوم.
طالبان یقینده خاتم اولنبیین مدرسهسینی هم قورشهب آلیب، اونی بۉشهتگن اېدی. طالبلرنینگ عدلیه وزیرلیگی اوشبو مدرسه جایلشگن یېرنی «دولت ملکی» دېب اعلان قیلگن.
طالبلرگه یقین یېتکرمه بوگون خاتم النبیین مدرسهسیدن قورال-یراغ و اۉق-داریلر تاپیلگنی حقیده خبر بېردی.
خاتم النبیین افغانستاندهگی شیعهلرنینگ آیتالله آصف محسنی تامانیدن تشکیل اېتیلگن اېنگ ییریک دیني مرکزی اېدی.
طالبلر اوشبو مدرسه و اونگه علاقهدار مؤسسهلر، جملهدن خاتم النبیین بیلیم یورتی همده تمدن تلویزیونی جایلشگن یېرلرنی «اۉزلشتیریب آلینگن» دېب حسابلهیدی.
