اروپا اتفاقی افغانستانده قیزلر و اۉغیل بالهلرنینگ تعلیم آلیشی همده سوادخوانلیگینی قۉللب-قوّتلش اوچون بیرلشگن ملتلر تشکیلاتینینگ تعلیم، علم و مدنیت تشکیلاتیگه (یونسکو۴.۷ میلیون یورو اجرهتدی.
اروپا اتفاقینینگ افغانستاندهگی نمایندهلیگی بوگون (سهشنبه، ۱۷-سنبله) «خلقارا سوادخوانلیک کونی» مناسبتی بیلن بېرگن بیاناتیده اوشبو مبلغ ۷ مینگ ۵۰۰کیشیگه سوادخوانلیک، شونینگدېک، تیریکچیلیک و ایش بیلن تأمینلنیش بیلن باغلیق کۉنیکمهلرنی اۉرگنیش امکانینی بېریشینی ایتدی.
نمایندهلیک اروپا اتفاقی افغانستاندهگی قیزلر و اۉغیل بالهلرنینگ تعلیمی همده سوادخوانلیگینی قۉللب-قوّتلشگه صادق اېکنینی و اولرگه ینه-ده یارقین کېلهجک قوریشده یاردم بېریشگه اینتیلهیاتگنینی بیلدیردی.
هر ییلی 8-سپتمبر بیرلشگن ملتلر تشکیلاتی و دنیا مملکتلری تامانیدن «خلقارا سوادخوانلیک کونی» صفتیده نشانلنهدی.
(یونسکو) نینگ معلوم قیلیشیچه، بو سنه بو ییل «آدملر، سیاره و فراوانلیک اوچون سوادخوانلیک» شعاری آستیده نشانلنماقده.
(یونسکو) گه کۉره، «بو کون سوادخوانلیکنینگ تعلیم آلیش، امکانیتلر یرهتیش و آدملر همده جمعیتلر اوچون یخشیراق کېلهجک برپا اېتیشدهگی رۉلی حقیده فکر یوریتیش اوچون امکانیتدیر».
اوشبو کون طالبان افغانستانده حاکمیتنی قَیته اېگهلهگنیدن سۉنگ ۶-صنفدن یوقاری صنفلرده قیزلرنینگ تعلیم آلیشینی تعقیقلهگن و بونینگ عاقبتیده قریب ۲.۵میلیون قیز مکتب و بیلیم یورتیگه باریش امکانیدن محروم بۉلگن بیر پیتده نشانلنماقده.
طالبلرنینگ چېکلاولری و انسانپرورلیک تشکیلاتلر مبلغلرینینگ یېتیشمسلیگی هم بوتون مملکت بۉیلب قیزلرنینگ سوادخوانلیک کورسلریگه کیریش امکانیتلرینی چېکلب قۉیگن.
