طالبلرنینگ کانلر و پترولیم وزیرلیگی ننگرهار ولایتینینگ «اسپین غر» اولسواللیگیدهگی شینواری منطقهسیده جایلشگن تالک کانینینگ اوچینچی بلاکینی قزیب آلیش بۉییچه «عمر فاروق» خصوصی شرکتی بیلن شرطنامه امضالنگنینی معلوم قیلدی.
اوشبو وزیرلیک بوگون (سهشنبه، ۱۷-سنبله) نشر قیلگن بیاناتیده شرطنامه کاننینگ ۶.۷۵کیلومتر مربع میدانینی قمرهب آلیشی و۴میلیون ۵۱۸مینگ ۳۰۰امریکا دالری قیمتیده امضالنگنینی بیلدیرگن.
طالبلرنینگ کانلر و نفت وزیری هدایتالله بدري شرطنامه توزگن شرکت اوشبو کاندن قزیب آلینگن هر بیر تُن تالک اوچون گروهگه بیر مینگ ۳۲۰افغاني مقداریده حقالامتیاز تۉلهشینی ایتگن.
اونینگ قۉشیمچه قیلیشیچه، شرکت کان حدودیده یشاوچی محلي اهالیگه اجتماعي خدمتلر کۉرسهتیشنی هم وعده قیلگن.
طالبلرنینگ کانلر و پترولیم وزیرلیگی اوشبو شرطنامه حقیده باشقه تفصیلاتلرنی معلوم قیلمهگن.
طالبلر افغانستانده حاکمیتنی قَیته اېگهلهگنیدن بېری مملکت کانلرینی قیدیریش و قزیب آلیش بۉییچه محلي و خارجي شرکتلر بیلن منتظم روشده شرطنامهلر امضالب کېلماقده.
اوشبو گروه کانلردن قزیب آلینگن محصولاتلرنی هم ساتهدی و حکومت خرجتلرینینگ بیر قِسمینی شو یۉل آرقهلی مالیهلشتیرهدی.
بیراق کانلرنی طالبان تامانیدن قزیب آلیش جریانی تنقیدلرگه هم سبب بۉلماقده. اَیریم سیاسي گروهلر طالباننی مملکت کانلرینی «تالان-تاراج قیلیش»ده عیبلهگن.
