طالبلرنینگ پنجشیر ولایتیدهگی والی ادارهسی اوشبو ولایت کانلریدن قزیب آلینگن ۱۱مینگ ۱۹۲قیراط زمرد ۳۰۷میلیون ۸۵۲مینگ افغانيگه ساتیلگنینی معلوم قیلدی.
طالبلرنینگ پنجشیر ولایتی حاکمی مطبوعات سوزلاوچیسی سیفالدین لتوننینگ ایتیشیچه، اوشبو مقداردهگی زمرد بوگون (سهشنبه،۱۷-سنبله) کیم آشدی آرقهلی ساتیلگن.
اونینگ قۉشیمچه قیلیشیچه، مذکور زمردلر سۉنگگی ایکّی هفته دوامیده پنجشیرنینگ حصه اوّل اولسواللیگیدهگی کانلردن قزیب آلینگن.
طالبلر افغانستانده حاکمیتنی قَیته قۉلگه کیریتگنیدن بویان پنجشیردهگی زمرد کانلرینی منتظم روشده قزیب آلیب، اولرنینگ محصولاتلرینی ساتیب کېلماقده.
بو گروه پنجشیر زمردلرینی ساتیشدن توشگن مبلغ نینگ ۱۰ فایزی اۉز خزینهسیگه توشیشینی، قالگن قِسمی اېسه شرطنامه اساسیده ایشلاوچی کمپنیلرگه بېریلیشینی اَیتماقده.
طالبلر زمرد کانلریدن تشقری، پنجشیردهگی طلا، یاقوت، گرینگارنت و بیروج کانلرینی هم قزیب آلماقده.
مملکت کانلرینینگ طالبلر تامانیدن قزیب آلینیشی کېنگ تنقیدلرگه هم سبب بۉلماقده. بیر قطار سیاسي گروهلر بو گروهنی مملکت کانلرینی تالان-تاراج قیلیشده عیبلهگن.
