افغانستانلیک تدقیقاتچی و مملکت سابق اتوم انرژیسی کمیسیونی باشلیغی طاهر شاران کانادا قیراللیک جمعیتی اعضاسی بۉلدی.
کانادا قیراللیک جمعیتی بوگون، چهارشنبه ۱۸-سنبله، ینگی اعضالری رۉیخطینی اعلان قیلدی. رۉیخطدن طاهر شاران نامی هم اۉرین آلگن.
جمعیتنینگ یازیشیچه، شاران جماعتچیلیک فعالیتی و هستوي سیاستنی ایشلب چیقیش همده عملگه آشیریشدهگی رهبرلیگی آرقهلی خلقارا همکارلیکنی، جملهدن، اتوم انرژیسی بۉییچه خلقارا اگېنتلیک بیلن هستوي فنلردن تینچ مقصدلرده فایدهلنیش ساحهسیدهگی همکارلیکنی رواجلنتیریشگه حصه قۉشگن.
کانادا قیراللیک جمعیتی، شونینگدېک، اونینگ فعالیتی علمي صلاحیت، عالي تحصیل و خلقارا همکارلیکنی کوچهیتیرگنینی تأکیدلهگن.
جمعیتنینگ قید اېتیشیچه، شاران خلقارا مقیاسده تن آلینگن نظري فیزیک تدقیقاتلرینی یېتکچی علمي رهبرلیک بیلن اویغونلشتیرهدی. اونینگ « آتوثانیهای علمی، اتوم فیزیکی و ناچیزیقلی اپتیک کوانتومی» ساحهلریدهگی تدقیقاتلری الکترونلر و مالیکوللرنینگ اۉته تېزکار دینامیکهسینی یخشیراق توشونیشگه یاردم بېرگن.
کانادا قیراللیک جمعیتی نینگ ینگی اعضالری ۱۳-نوامبر کونی اتاوا شهریده بۉلیب اۉتهدیگن مراسمده رسماً تنیشتیریلهدی.
کانادا قیراللیک جمعیتیگه اعضالیک مملکتدهگی اېنگ نفوذلی علمي و مدني مکافاتلردن بیری بۉلیب، کانادا بۉیلب تنیقلی تدقیقاتچیلر، صنعتکارلر و عالِملرگه بېریلهدی.
طاهر شاران طالبلر افغانستانده حاکمیتنی قَیته اېگهللشیدن آلدین افغانستان اتوم انرژیسی کمیسیونسیگه رهبرلیک قیلگن. طالبان حاکمیتگه کېلگنیدن سۉنگ او کاناداگه کۉچیب اۉتگن.
او حاضرده تورنتو بیلیم یورتینینگ فیزیک دیپارتمنتیده درس بېرهدی و علمي تدقیقاتلر آلیب بارهدی.
