بیرلشگن ملتلر تشکیلاتینینگ انسان حقوقلری بۉییچه عالي کمیساری ولکر تورکنینگ ایتیشیچه، طالبلر هر آی افغانستان خلقیگه قرشی سرکوبگرانه چېکلاولرنی کوچهیتیرماقده. شونگه قرهمهی، دنیا افغانستان خلقینی اونوتیب قۉیگندېک کۉرینماقده و اولرنی کوندن-کونگه آغیرلشیب بارهیاتگن شرایطده یالغیز قالدیرماقده.
بیرلشگن ملتلر تشکیلاتینینگ انسان حقوقلری بۉییچه عالي کمیساری بوگون، چهارشنبه کونی، ۱۸-سنبله، شوندهی دېدی: «بوگون افغانستانده کۉپلب انسانلرنینگ حیات شرایطی یاماندن ینه-ده یامانگه قرهب بارماقده. میلیونلب آدملر قشّاقلیکده یشماقده، انساننینگ اساسي حقوقلریگه حرمت تاباره کمهیماقده و یوز مینگلب آدملر اۉز خواهشلریگه قرشی بو مملکتگه قَیتریلماقده.»
ولکر تورک طالبلرنینگ عیاللر و قیزلرگه قرشی چېکلاولری حقیده هم شوندهی دېدی: «عیاللر و قیزلرنی جماعت حیاتیدن تیزیملی روشده چېتلشتیریش انسان حقوقلری نینگ مطلقا مامقبول بوزیلیشیدیر. بو بوزیلیش طالبلر رسميلری تامانیدن عادتي حالگه ایلنتیریلیب، نهادیللشتیریلماقده. جنسی آپارتایدگه آلیب کېلهیاتگن بوندهی چېکلاولرنینگ هېچ بیر جمعیتده اۉرنی یۉق.»
او، شونینگدېک، طالبلرنینگ سرکوبگرانه سیاستی و افغانستاندهگی انسانپرورلیک بحرانگه اشاره قیلیب، افغان مهاجرلری نینگ بو مملکتگه مجبورن چیقریب یوباریلیشینی تنقید قیلدی.
بیرلشگن ملتلر تشکیلاتینینگ انسان حقوقلری بۉییچه عالي کمیساری شوندهی دېدی: «کۉپلب آدملر حتا ایلگری هېچ قچان قدم باسمهگن مملکتگه کیریشگه مجبور قیلینماقده. اولر بو یېرده اۉته آغیر قشّاقلیک، آزیق-طعام، تازه ایچیملیک سووی تنقیصلیگی، ساغلیقنی سقلش خدمتلری، تعلیم و ایش بیلن تأمینلنیش امکانیتلری نینگ یېترلی اېمسلیگیگه دوچ کېلهدی.»
او قۉشیمچه قیلدی: «عینِ پیتده خارجي یاردم آقیمی دېیرلی توختهب قالگن و بو حالت خلقنینگ عذاب-عقوبتلرینی ینه-ده کوچهیتیرماقده.»
بیرلشگن ملتلر تشکیلاتینینگ انسان حقوقلری بۉییچه عالي کمیساری افغانستان فقرالرینی دېپورت قیلهیاتگن برچه دولتلردن اۉز قرارلرینی قَیته کۉریب چیقیشنی و «عذاب چېکهیاتگن اهالینینگ جانینی و حیاتینی اوستوار قۉییشنی» سۉرهدی.
طالبلر افغانستانده حاکمیتنی قَیته اېگهلهگنیدن بېری بو گروه تامانیدن خلقنینگ حقوق و اېرکینلیکلریگه قۉییلهیاتگن چېکلاولر همده مملکتدهگی انسانپرورلیک بحران تاباره کوچهییب بارماقده.
شو بیلن بیرگه، دنیا دولتلرینینگ افغانستانگه اجرهتهیاتگن یاردمی هر ییلی کمهییب، مملکتدهگی انسانپرورلیک یاردم دستورلری مبلغ یېتیشماوچیلیگیگه دوچ کېلماقده.
بیرلشگن ملتلر تشکیلاتی جاري ییلده هم افغانستاندهگی احتیاجمند اهالیگه یاردم کۉرسهتیش اوچون ۱.۷ میلیارد دالر مبلغ سۉرهگن. بیراق حاضرچه اوشبو مبلغ نینگ اتیگی ۳۰ فایزیدن سَل کۉپراغی تأمینلنگن.
