طالبلرنینگ نورستان ولایتیدهگی کانلر و پترولیم ریاستی اوشبو ولایت کانلریدن قزیب آلینگن بیوج و بلورکبی قیمتبها همده یریم قیمتبها تاشلر ۳.۹ میلیون افغانيگه ساتیلگنینی معلوم قیلدی.
طالبلرنینگ نورستاندهگی کانلر و پترولیم ریاستی باشلیغی سید رحیم عمیرنینگ ایتیشیچه، بو تاشلر بوگون، چهارشنبه کونی، ۱۸سنبله، ولایت مرکزیده اۉتکزیلگن کیم آشدیده ساتیلگن.
اونینگ قۉشیمچه قیلیشیچه، اوشبو قیمتبها و یریم قیمتبها تاشلرنی ساتیشدن توشگن۳۹ مینگ۵۰۰ افغاني درآمد طالبلر خزینهسیگه تاپشیریلهدی.
سید رحیم عمیرنینگ ایتیشیچه، بیوج و بلور تاشلری نورستان مرکزی پارون شهری همده «کانتیوا» اولسوالیگیدهگی کانلردن قزیب آلینگن.
طالبلر بوندن آلدین هم نورستان کانلریدن قیمتبها و یریم قیمتبها تاشلرنی بیر نېچه بار قزیب آلیب، ساتگن.
بو گروه افغانستانده حاکمیتنی قَیته اېگهلهگنیدن سۉنگ مملکت بۉیلب کانلرنی قزیب آلیشنی باشلهگن. اولر باشقروو خرجتلرینینگ بیر قِسمینی کانلرنی قیدیریش و قزیب آلیش بۉییچه شرطنامهلر همده قزیب آلینگن محصولاتلرنی ساتیشدن توشهدیگن درآمدلر حسابیدن قاپلهیدی.
طالبلرنینگ مملکت کانلرینی قزیب آلیشی کېنگ تنقیدلرگه هم سبب بۉلگن. کۉپلب سیاسي گروهلر بو گروهنی افغانستان طبيعي بایلیکلرینی تالان-تاراج قیلیشده عیبلب کېلماقده.
