خلقارا عامهوي اخبارات واسطهلری یمندهگی حوثيلر استراتیژیک اهمیتگه اېگه بۉلگن المخا پورت شهرینی نظارتیگه آلگنی و بابالمندب بۉغازی تامان ایلگریلهیاتگنینی خبر قیلدی.
گواهلر فرانسه اخبارات آژانسیگه بېرگن معلوماتیده حوثي کوچلری شهرگه کیریب کېلهیاتگنینی کۉرگنلرینی ایتیشگن. اولرنینگ ایتیشیچه، حوثيلر «امریکاگه اۉلیم، اسرایلگه اۉلیم» شعارلرینی ایتیب کېلگن.
رویترز هم ایرانگه یقین بۉلگن حوثيلر دنیانینگ اېنگ مهم یوک تشیش یۉللریدن بیری حسابلنگن بابالمندب بۉغازیده باسیم واسطهسیگه اېگه بۉلیشگه ینه بیر قدم یقینلشگنینی یازدی.
یمن حکومتیدهگی تۉرت حربي منبع حوثيلر المخا کبی تاریخي بندر شهرلری و بۉغازگه تۉغریدن-تۉغری توتهش جایلشگن ذباب حدودینی تۉلیق نظارت قیلیشگه یقینلشگنینی ایتگن. منبعلرگه کۉره، اولر یمن نینگ قیزیل دېنگیز ساحلینینگ بوتون قِسمینی نظارت قیلیشگه اینتیلماقده.
سۉنگگی کونلرده سعوديه عربستانی تامانیدن قۉللب-قوّتلنهیاتگن و خلقارا همجمعیت تامانیدن تن آلینگن یمن حکومتی کوچلری بیلن حوثيلر اۉرتهسیدهگی تۉقنهشوولر کوچهیگن.
رویترز بو تۉقنهشوولر جهان انرژی منبعلریگه تهدید سالهیاتگن ایران اوروشینینگ ینه بیر جبههسی اېکنینی یازدی.
«کۉز یاشلر دروازهسی» دېگن معنانی انگلهتووچی باب المندب بۉغازی اوشبو حدوددهگی کېمهچیلیک اوچون خوفلی شرایطلر سببلی شوندهی ناملنگن. بو بۉغاز قیزیل دېنگیزنینگ جَنوبي چیقیش قِسمی بۉلیب، عربستان یریم آرالیده جایلشگن یمن بیلن افریقانینگ جیبوتی و اریتره ساحللری اۉرتهسیده جایلشگن.
شو سببلی اوشبو بۉغاز یمننینگ اېنگ زیچ اهالی یشهیدیگن حدودلری و مملکت شِمالینینگ کتّه قِسمینی نظارت قیلهیاتگن حوثيلر اوچون مهم استراتژیک نشان حسابلنهدی.
