اروپا اتفاقینینگ افغانستان بۉییچه مخصوص وکیلی ژیل برتراننینگ افغانستاندهگی وکالت مدتی یکونلنگنینی معلوم قیلدی.
او بوگون (پنجشنبه، ۱۹-سنبله) ایکسدهگی صحیفهسیده یازیشیچه، اۉز ماموریتینی «افغانستان خلقینینگ برچه قتلملری اۉرتهسیدهگی ملاقات مملکت اوچون یگانه یۉل» دېگن ایشانچ بیلن یکونلهماقده.
ژیل برتران: «بو مملکتدهگی عیاللر و یاشلر اۉز یورتی اوچون یخشیراق کېلهجک برپا اېتیشده کتّه حصه قۉشیشلری ممکن»، دېب قۉشیمچه قیلگن.
اونینگ ایتیشیچه، افغانستان و اونینگ خلقی اروپا اوچون مهم. اروپا اتفاقینینگ 2021-ییلدن کېینگی، طالباننی نارمللشتیرمسلیک یاکه اونگه قانونيلیک بېرمسلیککه اساسلنگن پرینسپال یاندشووی هم عیناً شو مهملیکنی عکس اېتتیرهدی.
اروپا اتفاقینینگ سابق مخصوص وکیلی یکونده طالبان رسميلری بیلن چوقور کېلیشماوچیلیکلرگه قرهمهی، بو گروه بیلن آلیب بارگن حرمتگه اساسلنگن ملاقاتلرینی قدرلشینی ایتگن.
ژیل برتران اۉتگن هجري-شمسي ییل نینگ میزان آییده اروپا اتفاقینینگ افغانستان بۉییچه مخصوص وکیلی اېتیب تعیینلنگن اېدی.
او وکالت مدتی دوامیده بیر نېچه بار افغانستانگه سفر قیلیب، کابلده طالبان رسميلری، دیپلوماتلر، ژورنالیستلر و فقرالیک فعاللری بیلن اوچرهشیب، مذاکرهلر آلیب باردی.
ژیل برتران افغانستانگه جاري ییلنینگ ثور آییده عملگه آشیرگن سۉنگگی سفری چاغیده اروپا اتفاقی افغانستانده ترورچی گروهلر موجودلیگیدن خواطرده اېکنینی ایتگن اېدی.
او بوندن اوّل هم طالبلرنینگ عیاللر و قیزلرگه نسبتاً چېکلاولرینی تنقید قیلیب، بو چېکلاولرنی بېکار قیلیشگه چقیرگن اېدی.
