منبعلرنینگ ارزگان و خوستدهگی معلوماتلریگه کۉره، بو ایکّی ولایتده بیر اېرکک و بیر باله اۉلدیریلگن.
ارزگان ولایتیدهگی بیر منبعنینگ ایتیشیچه، کېچه تونده (چهارشنبه، ۱۸-سنبله) «نامعلوم قوراللی شخصلر» خاص ارزگان اولسواللیگیدهگی بیر کلینیکده عیال شفاکارنینگ محرمی صفتیده بۉلگن اېرککنی اۉلدیرگن.
منبعگه کۉره، هزاره ملتیگه منسوب بو اېرکک خاص ارزگان اولسواللیگینینگ «سلطان محمد» قیشلاغیدهگی دولت کلینیکیده اۉق اوزیلیشی عاقبتیده هلاک بۉلگن.
حاضرچه بو اېرککنینگ نیمه سببدن اۉلدیریلگنی معلوم اېمس. ارزگاننینگ طالبان تامانیدن تعیینلنگن محلي مسووللری هم بو بارهده ایضاح بېرمهگن.
طالبلرنینگ امر به معروف و نهي از منکر ادارهسی تامانیدن جاري اېتیلگن چېکلاولرگه کۉره، اوروزگان ولایتیده عیال شفاکارلر ایش جاییگه باریش اوچون اېرکک محرم همراهلیگیده بۉلیشلری کېرهک.
عینِ پیتده خوستدهگی محلي منبعلر ولایت مرکزیدن یېتّی یاشلی بالهنینگ جسدی تاپیلگنی حقیده خبر بېرگن.
منبعلرنینگ ایتیشیچه، باله کېچه توشدن کېین بېدرَک یۉقالگن و اونینگ جسدی بوگون (پنجشنبه، ۱۹-سنبله) ساعت ۱۰:۰۰ اطرافیده سوو تۉغانیدن تاپیلگن.
منبعلرنینگ معلوماتیگه کۉره، باله دستلب اۉلدیریلگن، کېین اېسه جسدی سوو تۉغانیگه تشلنگن.
منبعلر بالهنینگ آتهسی اوچ غیلدیرهکلی موترتسیکل هیداوچیسی اېکنینی و اولرنینگ عایلهسی هېچ کیم بیلن شخصي عداوتی بۉلمهگنینی اَیتماقده.
بوندن اوّل مملکت جَنوبیدهگی قندهار ولایتیدن ینه بیر قاتللیک حقیده خبر بېریلگن اېدی. شو طریقه بیر کون ایچیده خبر قیلینگن سِرلی قاتللیکلر سانی اوچ نفرگه یېتدی.
بو قاتللیکلر طالبلر اوشبو گروه حاکمیتنی قَیته اېگهلهگنیدن سۉنگ مملکتده عمومي خوفسیزلیک تأمینلنگنینی دعوا قیلهیاتگن بیر پیتده صادر بۉلماقده.
