طالبلر باش وزیرینینگ اقتصادي مسألهلر بۉییچه اۉرینباسری عبدالغنی برادر، تورکيهنینگ کابلدهگی اېلچیسی سادین یلدیزبیلن اوچرهشووده افغانستانلیک مهاجرلرنینگ تورکيهدهگی معمالرینی حل اېتیشنی سۉرهگن.
طالبلر باش وزیری اقتصادي مسألهلر بۉییچه اۉرینباسری ادارهسی بیاناتیده ایتیلیشیچه، اوچرهشوو بوگون (پنجشنبه، ۱۹-سنبله) بۉلیب اۉتگن. اونده اقتصادي، سودا و ترانزیت علاقهلرینی رواجلنتیریش، شونینگدېک، افغانستانلیک مهاجرلرنینگ تورکيهدهگی معمالری محاکمه قیلینگن.
تورکيه جاري ییلنینگ دستلبکی سکّیز آییده حجتسیز بۉلگن ۲۵ مینگدن آرتیق افغانستانلیک باشپناه ایزلاوچینی حبسگه آلگن.
تورکيه مهاجرلر ادارهسی آماری شونی کۉرسهتهدیکی، افغانستان فقرالری تورکيهده حبسگه آلینگن باشپناه ایزلاوچیلر رۉیخطیده بیرینچی اۉرینده تورهدی. کۉپلب باشپناه ایزلاوچیلر حبسخانهلریدن طالبان نظارتیدهگی افغانستانگه دېپورت قیلینهدی.
مینگلب افغانستان فقرالری اروپا مملکتلریگه کۉچیب اۉتیش مقصدیده تورکيهگه بارگن، بیراق اولرنینگ کۉپچیلیگی تورکيه پولیسی تامانیدن حبسگه آلینگچ، ینه افغانستانگه دېپورت قیلینهدی.
طالبلر باش وزیری اقتصادي مسألهلر بۉییچه اۉرینباسری ادارهسی تورکيه اېلچیسی مهاجرلرنینگ حبسگه آلینیشی یوزهسیدن قندهی ایضاح بېرگنینی معلوم قیلمهگن. بیراق اونینگ سۉزلریگه کۉره، افغانستان فقرالریگه تورکيه ویزهلرینی بېریشده قولهیلیکلر یرهتیلگن و ینه-ده کۉپراق یېنگیللیکلر یرهتیش اوستیده ایش آلیب باریلماقده.
