اروپا اتفاقی و بیرلشگن ملتلر تشکیلاتینینگ آزیق-طعام و قیشلاق اېکینچیلیک تشکیلاتی (فائو) افغانستاندهگی دهقانلر اېکینچلیک ساحهسیدهگی تجارتلرگه یاردم بېریش اوچون ۵میلیون یورولیک لایحه یۉلگه قۉییلگنینی معلوم قیلدی.
مذکور ایکّی تشکیلات بوگون (یکشنبه، ۲۲-سنبله) نشر قیلگن بیاناتیده لایحه آزیق-طعام و آزیقلنیش خوفسیزلیگی، اقلیم خطرلری همده اقتصادي امکانیتلری چېکلنگن تومنلرده ضعیف عایلهلر، جملهدن، قَیتیب کېلگنلر، ایچکی کۉچیریلگنلر و مېزبان جماعهلرنی قۉللب-قوّتلشینی بیلدیردی.
معلوم قیلینیشیچه، لایحه دایرهسیده دهقانلرگه اقلیم تحلیللری و اېرته آگاهلنتیریش معلوماتلریدن فایدهلنیش امکانینی بېرهدیگن مصلحت مرکزلری تشکیل اېتیلهدی. بو دهقانلرگه اۉزگریب بارهیاتگن شرایطگه ماس روشده ایشلب چیقریش و محصولاتلرنی ساتیش بۉییچه اۉز وقتیده قرارلر قبول قیلیش امکانینی بېرهدی.
نشر قیلینگن بیاناتگه کۉره، لایحه دایرهسیده، شونینگدېک، ۲ مینگ هکتار دېگرادتسيهگه اوچرهگن اۉرمان و ییلاولر قَیته تیکلنهدی همده عیاللر و محلي جماعهلر تامانیدن باشقریلهدیگن ۲۵۰ته کۉچتخانهگه یاردم کۉرسهتیلهدی.
قیشلاق خۉجهلیگی و آزیق-طعام ساحهسیده فعالیت یوریتووچی کمپنیلر همده محیط زیست جهتدن برقرار بیزنسلرگه ماسلشتیریلگن گرانتلر اجرهتیش هم لایحهنینگ بیر قِسمی حسابلنهدی.
اروپا اتفاقینینگ افغانستان بۉییچه ینگی مؤقت ایشلر وکیلی نیکولا بلومو شوندهی دېدی: «اروپا اتفاقینینگ (فائو) کۉرسهتهیاتگن یاردمی افغانستان خلقینینگ آزیق-طعام خوفسیزلیگی و اقتصادي امکانیتلرینی کېنگهیتیریشگه بۉلگن دایمي صداقتیمیزنی نمایش اېتهدی. افغانستاننینگ قیشلاق خۉجهلیگی صلاحیتی هنوزگچه یېترلیچه اعتبارگه آلینمهگن، مملکتنینگ اقلیمي ضعیفلیگی اېسه بو امکانیتدن فایدهلنیشگه تۉسقینلیک قیلماقده.»
(فائو) نینگ افغانستاندهگی وکیلی یچارد ترنچارد شوندهی دېدی: «اساسن انسان پرورلیک دستورلردن ینهده برقرار یاندشوولرگه اۉتهیاتگن بیر پیتده، افغانستاننینگ قیشلاق خۉجهلیگی و آزیق-طعام ساحهسیدهگی بیزنسلری نهایتده آغیر شرایطده هم اۉسیش، ایش اۉرینلری یرهتیش و دقهانلرنی بازارلر بیلن باغلش بۉییچه حقیقی امکانیتینی نمایش اېتماقده.»
اونینگ ایتیشیچه، اروپا اتفاقی و قیشلاق خۉجهلیگی ساحهسیدهگی تجارتلرگه سرمایه کیریتیش و رواجلنیشده یاردم بېرهدی.
بیرلشگن ملتلر تشکیلاتی رسميسی شوندهی دېدی: «دقهانلر ایشانچ بیلن محصولات یېتیشتیره آلسه، بیزنسلر رواجلنسه و محصولاتلر بازارلرگه یېتیب بارسه، قیشلاق خۉجهلیگی تیکلنیش و برقرارلیکنی تأمینلش نینگ کوچلی حرکتلنتیرووچی کوچیگه ایلنهدی.»
