«افغانستان اسلام جمعیتی» حزبی رهبری صلاحالدین ربانی طالبلر افغانستانگه «قۉلگه کیریتیلگن اۉلجه صفتیده» مناسبتده بۉلهیاتگنی و «کویدیریلگن یېر سیاستی»نی دوام اېتتیرهیاتگنینی ایتدی.
ربانی بوگون (یکشنبه، ۲۲-سنبله) «شهیدلر هفتهلیگی» مناسبتی بیلن اۉتکزیلگن آنلاین ییغیلیشده سۉزلر اېکن، طالبلرنینگ افغانستان توپراغیگه اۉلجه صفتیده قرهشی مملکتدهگی تورلی اېتنیک گروهلر اۉرتهسیده عداوت پیدا بۉلیشیگه سبب بۉلهیاتگنینی تأکیدلهدی.
او، شونینگدېک، عیاللر و قیزلرنینگ تعلیم آلیشینی تعقیقلشنی «نااۉرین، شریعتگه ضد و غیرِ انساني سیاست» دېب اتهدی. بیراق افغانستاندهگی بحران عیاللر تعلیمیدن هم کتّهراق اېکنینی بیلدیردی.
ربانی طالبلر تامانیدن مملکت کانلرینینگ قزیب آلینیشی حقیده هم توختهلیب، بو گروه کانلرنی قزیب آلیش جریانیده محلي اهالینینگ حقوقلرینی انابتگه آلمهیاتگنینی ایتدی.
اونینگ تأکیدلشیچه، افغانستان کانلری اطراف-محیط مسألهلریگه رعایه قیلینمهگن حالده حددن تشقری و نظارتسیز قزیب آلینماقده. بونینگ عاقبتلری اېسه محلي اهالینینگ کېلهجگینی خوف آستیده قالدیرماقده.
«افغانستان اسلام جمعیتی» حزبی رهبری طالبلرگه قرشی کوچلرنی «عمومي مقصد»گه اعتبار قرهتیشگه چقیردی و بیردملیکنی تأمینلش یۉلیدهگی هر قندهی حرکتنی قدرلش کېرهکلیگینی تأکیدلهدی.
«افغانستان اسلام جمعیتی» حزبی و «افغانستان ملي قرشیلیک جبههسی» بوگون آنلاین ییغیلیشده سابق مجاهدلر قوماندانی احمدشاه مسعود اۉلدیریلگنی نینگ ۲۵ییللیگی همده «افغانستان اسلام جمعیتی» نینگ سابق رهبری برهانالدین ربانی اۉلدیریلگنی نینگ ۱۵ ییللیگینی نشانلهماقده.
ییغیلیش معروضهچیلری طالبانگه قرشی بۉلگن شخصلر بۉلیب، اولر اۉز چیقیشلریده مملکتنینگ طالبلر حکمرانلیگی آستیدهگی حاضرگی حالتینی تنقید قیلماقده.
