افغانستان اسلامي خلق بیرلیگی حزبی رهبری محمد محققنینگ ایتیشیچه، طالبان سیاستی ۴۰میلیوندن آرتیق آدمنی «قاره کونلرگه» دچار قیلگن و مملکتنی بو وضعیتدن آلیب چیقیش یۉلی «جهادگه قَیتیش»دیر.
محقق بوگون (یکشنبه، ۲۲-سنبله) «شهیدلر هفتهلیگی» مناسبتی بیلن اۉتکزیلگن آنلاین ییغیلیشده سۉزلر اېکن، «جهاد و قرشیلیک بیراغی هیلپیرهب تورگن پیتده بیز باشیمیز بلند اېدیک»، بیراق «مجاهدلر امریکانینگ ظاهري جاذبهسیگه الدنیب، قوراللرینی یېرگه قۉییشدی»، دېدی.
محققنینگ قۉشیمچه قیلیشیچه، «شوروی اتفاقیگه قرشی جهاد جنایت دېب بهالنگنیدن» سۉنگ مجاهدلر «اوروشقاق» صفتیده کۉرسهتیلدی و «عزتیمیز کېتدی». اونینگ ایتیشیچه، بوگون هم «ایستهلمهگن مهمانلر» قۉلیده قالیب کېتگنمیز.
افغانستان اسلامي خلق بیرلیگی حزبی رهبری طالبلر امریکا بیلن «اویتلی تیل بیریکتیریش» آرقهلی افغانستانده حاکمیتنی اېگهلهگنینی ایتدی. اونینگ تأکیدلشیچه، بو گروه حکمرانلیگی آستیده برچه افغانستانلیکلر، خصوصاً، همه نرسهسی هجوم آستیده قالهیاتگن هزاره و شیعه جماعهلری اوچون یشش شرایطی ینه-ده تارهیگن.
او خلقارا همجمعیت افغانستان خلقینینگ «اَینچلی تقدیری»نی طالبلر بیلن سودالشمسلیککه و بو گروهنینگ افغانستان خلقیگه قرهتیلگن قیلیچینی ینه-ده اۉتکیرلشتیرمسلیککه چقیردی.
محقق دنیانی طالبلر بیلن همکارلیک قیلیش اۉرنیگه، افغانستان خلقیگه اۉز آزادلیگینی قۉلگه کیریتیشده یاردم بېریشگه چقیردی.
محمد محقق طالبلرنینگ افغانستاندهگی بیرینچی حکمرانلیگی دوریده مملکت شِمالیده بو گروهگه قرشی جنگ قیلگن. طالبان افغانستانده قَیته حاکمیتنی اېگهلهگنیدن سۉنگ او مملکتنی ترک اېتگن و حاضر تورکيهده یشهیدی.
