چیننینگ افغانستاندهگی اېلچیسی جاو شینگ ماموریتی یکونلنیشی مناسبتی بیلن طالبلرنینگ ایچکی ایشلر وزیری سراجالدین حقّانی بیلن «خیرلشوو» اوچرهشووینی اۉتکزدی.
طالبلر ایچکی ایشلر وزیرلیگی بوگون (دوشنبه، ۲۳-سنبله) نشر قیلگن بیاناتیده سراجالدین حقّاني اوچرهشووده جاو شینگنینگ طالبلر و چین اۉرتهسیدهگی مناسبتلرنی مستحکملشدهگی رۉلینی ایجابي بهالهگنینی معلوم قیلدی.
طالبلر ایچکی ایشلر وزیرلیگینینگ قۉشیمچه قیلیشیچه، چین اېلچیسی افغانستاندهگی فعالیتی دوامیده اوشبو وزیرلیک تامانیدن کۉرسهتیلگن همکارلیک اوچون منّتدارلیک بیلدیرگن و طالبان بیلن چین اۉرتهسیدهگی مناسبتلر ینه-ده کېنگهییشیگه امید بیلدیرگن.
چیننینگ کابلدهگی اېلچیسی بوندن اوّل طالبلر تشقی ایشلر وزیری امیرخان متقي بیلن هم خیرلشوو اوچرهشووینی اۉتکزگن اېدی.
جاو شینگ ۱۴۰۲-هجري شمسي ییلده چیننینگ افغانستاندهگی اېلچیسی اېتیب تعیینلنگن و اۉشه ییل نینگ سنبله آییده اۉز ایشانچ یارلیغینی رسماً طالبلر باش وزیری ملا محمدحسن آخوندگه تاپشیرگن.
او ایشانچ یارلیغینی طالبان باش وزیریگه تاپشیرگن بیرینچی خارجي دولت اېلچیسی بۉلگن.
چین سۉنگگی بېش ییلدن آرتیق وقت دوامیده طالبلر بیلن کېنگ سیاسي و اقتصادي علاقهلرنی یۉلگه قۉیگن، بیراق هنوزگچه بو گروه حکومتینی رسماً تن آلمهگن.
حاضرده روسيه طالبلر حکومتینی افغانستانده رسماً تن آلگن دنیادهگی یگانه دولت حسابلنهدی.
