افغانستاننینگ اوچ کیشی وطنداشی، جملهدن ایکّی نفر یاش ییگیت ایراننینگ ساوه شهریده قودوق قزیش وقتیده هلاک بۉلدی.
مذکور حادثهده 22 یاشلی سهراب محمدي، ۴۴یاشلی محمدآلدین آستانه و ۲۵ یاشلی غلام محمودی هلاک بۉلگن. اولرنینگ اوچهلهسی هم فاریاب ولایتینینگ قَیصار اولسواللیگی غۉره قیشلاغینینگ یشاووچیسی بۉلگن.
قربانلردن بیرینینگ قرینداشی «اطلاعات روز» گزیتهسیگه یوبارگن پیامیده ایتیشیچه، اوچ نفر ایشچی چهارشنبه کونی (۱۸-سنبله) قودوق ایچیده ایشلهیاتگن پیتده گازدن زهرلنیب، حیاتدن کۉز یومگن.
ایراننینگ «کاوه»اخبارات آژانسی هم اوشبو اوچ ایشچی «کاوه» صناعت مجموعهسیده قودوق قزیش ایشلری بیلن شغللنهیاتگن پیتده قودوقنینگ تۉستدن اۉپیریلیب کېتیشی عاقبتیده ایچکریده قالیب، هلاک بۉلگنینی خبر قیلگن.
فاریابدهگی بیر منبع «اطلاعات روز» گزیتهسیگه بېرگن صحبتیده قربانلرنینگ شخصینی معلوم قیلگن.
منبعنینگ ایتیشیچه، محمدالدین آستانه افغانستاننینگ سابق حکومتیگه قرهشلی پولیس خادملریدن بیری بۉلگن. منبع ینه ایکّی یاش ییگیت هم اویلنگن و ایش مهاجری صفتیده ایشلهگنینی بیلدیرگن.
منبعنینگ قۉشیمچه قیلیشیچه، اوچ ایشچینینگ جسدی افغانستانگه آلیب کېلینیشی رېجهلشتیریلگن.
بوندن آلدین هم افغانستان فقرالری ایرانده شونگه اۉخشش حادثهلرده هلاک بۉلگن. خوفسیزلیک واسطهلریگه یېترلیچه اعتبار بېریلمسلیگی بوندهی فاجعهلی حادثهلرنینگ اساسي عامللریدن بیری صفتیده کۉریلهدی.
افغانستان وطنداشلری ایرانده اساسن آغیر ایش، جملهدن قودوق قزیش و قوریلیش ایشلریده ایشلهیدی.
